هەواڵ

شێخ جەعفەر بەرزنجی، دوای بیست ساڵ لە خۆشاردنەوە لە ئوردن کۆچی دوای کرد

شێخ جەعفەر کوڕی شێخ عەبدلکەریمی کوڕی شێخ حسێنی قادرکەرەمە لە ساڵی ۱۹۳٨ کە شارۆچکەی قادرکەرەم لەدایک بووە. لە کۆتای حەفتاکانی سەدەی ڕابردوو پەیوەندی بە بەعسەوە کردووە. چەندین لێپرسراوێتی لەناو بەعس هەبووە. دیارترین پۆست کە شێخ جەعفەر بەرزنجی وەریگرتبێ پارێزگاری سلێمانی بووە لە هەشتاکان. برایەکی بەناوی موعتەسەم فەرماندەی فەوج بووە لە سەردەمی بەعس و لەسەر دەستی خۆی و براکەی نزیکەی سێ هەزار کەس ئەنفال کراون. لە ڕۆژگاری حکومڕانی شێخ جەعفەر تاوانەکانی بەعس لە سلێمانی و قادرکەرەم زیاتر بوون و بەهۆی ئەو بەشداریەی لە تاوانەکانی ڕژێم دوای ڕاپەڕین شێخ جەعفەر و براکەی ڕوو دەکەنە بەغدا. موعتەسەمی برای لە سەرەتای نەوەدەکان لە ڕووداوێکی گوماناوی لەبەغدا بێ سەروشوێن دەکرێت. چەند ڕۆژێک دوای پڕۆسەی ئازادی عێراق و لە ۳۰ی نیسانی ۲۰۰۳ لە دادگای سلێمانی بەهۆی سکاڵای کەسوکاری ئەنفالکراوانی قادرکەرەم فەرمانی گرتن بۆ شێخ جەعفەر بەرزنجی دەردەچێت. لەو کاتەوە بە شێوەی نیمچە نهێنی لە نێوان ئوردن و ڕوسیا و سوریا دەژێت و خۆی دەشارێتەوە تا سەرئەنجام بەهۆی نەخۆشیەوە لە ۲٦ی تەمووزی ۲۰۲٤ کۆچی دوای دەکات.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.