هەواڵ

ئەمرۆ پلەی گەرما زیاتر بەرز دەبێتەوە

بەپێی پێشبینییەكانی كەشناسی ئەمڕۆ پلەی گەرمی كەمێك بەرزدەبێتەوە و سبەینێش كەمێك دادەبەزێت. بەڕێوەبەرایەتیی گشتیی كەشناسی و بومەلەرزەزانیی هەرێم رایگەیاند، ئەمڕۆ ئاسمان ساماڵ و پەڵەهەور دەبێت، پلەی گەرمی کەمێک بەرزدەبێتەوە بەراورد بە تۆماركراوی دوێنێ. سەبارەت بە كەشوهەوای سبەینێش دەڵێت، ئاسمان ساماڵ دەبێت و، پلەی گەرمی یەك پلە نزمدەبێتەوە بەراورد بە تۆماركراوەكانی ئەمڕۆ و خێرایی با-ش مامناوەند دەبێت. بەرزترین پلەی گەرمیی پێشبینیكراویش بە پلەی سیلیزی بەمجۆرە دەبێت،

هەولێر 39 پلە

سلێمانی 37

دهۆک 38

کەرکوک 40

هەڵەبجە 38

زاخۆ 39

سۆران 36

حاجی ئۆمەران 26

گەرمیان 40 پلە دەبێت.

هاوکات ئاراس جەبار شارەزا لەبواری کەشناسی ئاماژەی بۆ ئەوەشکرد کە هەینی یەکەم بارانی ساڵ بە شیوەی پچڕ پچڕ دەبارێت و جەوێکی پایزە ڕوومان تێدەکات وتیشی تا ڕۆژی شەمە بەردوەوام دەبێت

هەواڵ

مەترسییەکانی بە قەزابوونی قەرەتەپە لایەنە کوردییەکان یەکدەخات

دوای ئەوەی ئەنجومەنی پارێزگای دیالە بڕیاری بە قەزابوونی ناحەی قەرەتەپەی دەرکرد، لایەنە کوردییەکان بە توندی دژی بڕیارەکە وەستاونەتەوە، جەختدەکەنەوە، بڕیارەکە هەوڵێکە بۆ تێکدانی دیمۆگرافیای ناوچەکە و هەروەها، بڕیارەکە پێچەوانەی مادەی 140ـى دەستورە.

ئەنجومەنی پارێزگای دیالە بەکۆی دەنگ، بڕیاری بە قەزابوونی ناحیەی قەرەتەپەی پەسەندکرد، کە ناحیەیەکی سەر بە قەزای خانەقین بوو، بەپێی بڕیارەکە، جگەلەوەی قەرەتەپە لە خانەقین دادەبڕێت، ناحیەکانی کۆکس و جەبارە لە کفری دادەبڕێت و دەخرێنە سەر قەزا تازەکە.

بڕیارەکە نیگەرانی لایەنە کوردییەکانی لێکەوتووەتەوە و و پێیانوایە، بڕیارەکە هەوڵێکە بۆ تێکدانی دیمۆگرافیای ناوچەکە و پێچەوانەی مادەی 140ـى دەستورە.

بۆ رەتکردنەوەی بڕیارەکە، ئەمڕۆ سەرجەم لایەنە کوردییەکان لە خانەقین کۆدەبنەوە، بە وتەی شێرکۆ میروەیس، لێپرسراوی مەڵبەندی یەکێتی لە خانەقین لە کۆبونەوەکەدا، بڕیارێکی بەکۆمەڵ دەدەن بۆ رەتکردنەوەی ئەو ستەمەی لە کورد دەکرێت .

لێپرسراوی مەڵبەندی یەکێتی لە خانەقین وتیشی: پێشێلکارییەکە مەترسییە لەسەر هەموو کوردستان و ئایندەی کورد لە ناوچە کوردستانییەکانی دەرەوەی ئیدارەی هەرێمی کوردستان.

ئەوس مەهداوی، نوێنەری یەکێتی لە ئەنجومەنی پارێزگای دیالە رایگەیاند، ناحیەی قەرەتەپە هێشتا تایبەتمەندیی بەقەزابوونی تێدانییە، ژمارەی دانیشتووانەکەشی لە 400 هەزار تێپەڕ ناکات، تاوەکو بێتە قەزا، بەڵام وەزیری پلاندانان، وەک کارێکی سیاسی ئەوەی کردووە، چونکە ئەوەی ئێستا بەڕێوەبەری ناحیەکەیە لە رووی سیاسییەوە سەر بە ئەوە، ئەو کارەش بۆ بانگەشەی هەڵبژاردن بەکاردەهێنێت.