هەواڵ

شەماڵ عەبدولوەفا بۆ Mic: کاندیدی رێکخەری گشتی گۆڕان نیم و نابم

تا ئیستا دانا ئەحمەد مەجید تاکە کاندیدی رێکخەری گشتی بزوتنەوەی گۆڕانە و شەماڵ عەبدولوەفا دەڵێت، کاندیدی رێکخەری گشتی گۆڕان نیم و نابم. 

 شەماڵ عەبدولوەفا سیاسەتمەدار و  ئەندامی پێشووی خانەی راپەراندنی گۆڕان بە دیجیتاڵ میدیای Micـی راگەیاند، کاندیدی رێکخەری گشتی گۆڕان نیم و نابم. 

چەند دەنگۆیەک هەبوون کە باسیان لە کاندیدبوونی شەماڵ عەبدولوەفا دەکرد بۆ پۆستی رێکخەری گشتی بزوتنەوەی گۆڕان، بەڵام ناوبراو ئەو دەنگۆیانەی رەتکردەوە.

لە ماوەی رابردوو، پێش قوڵبوونەوەی ناکۆییەکانی گۆڕان داوا لە شەماڵ عەبدولوەفا کراوە پۆستی رێکخەری گشتی گۆڕان وەربگرێت، وەک خۆی وتی،" ئەو کاتیش رەتیکردوەتەوە". 

ئەمڕۆ بزوتنەوەی گۆڕان کۆنگرە یان وەک خۆیان ناوییان ناوە کۆنفرانسی نیشتمانی بۆ یەکلاییکردنەوەی چارەنووسی بزوتنەوەکە لە نێوان ئاڕاستەی کوردسات و گردی زەگەتەدا دەبەستێت.

ئاڕاستەی گردی زەرگەتە رەشنووسی دەستورێکی ناوخۆیی بۆ گۆڕان ئامادە کردووە کە لە دەرەوەی کۆنفرانس رێکخەری گشتی هەڵدەبژێردرێت.

بەپێی ڕەشنوسی دەستوری ناوخۆیی گۆڕانیش کە ئاڕاستەی کوردسات ئامادەیی کردووە، رێکخەری گشتی راستەوخۆ لەناو کۆنفرانسدا هەڵدەبژێردرێت کە دانا ئەحمەد مەجید تاکە کاندیدە بۆ وەرگرتنی پۆستەکە.

بزوتنەوەی گۆڕان سەرەتای ساڵی 2024، کۆنفرانسی سێیەمی بە بەشداری هەردوو بەرە ناکۆکە ئەنجامدا، بەڵام کۆمسیۆن قبوڵی نەکرد.

دوای دابڕانی هەردوو ئاڕاستەکە، ئاڕاستەی گردی زەرگەتە لە 5ـی نیسانی ئەمساڵ کۆنفرانسی کرد، بەڵام کۆمسیۆن ئامادەیی کۆنفرانسەکە نەبوو. 

26ـی نیسان، ئاڕاستەی کوردسات کۆنفرانسی کرد، بەڵام رێژەی یاسایی ئامادەیی کۆنفرانسەکە نەبوو، کۆمسیۆن کۆنفرانسەکەی هەڵگرت.

هەواڵ

"نەبونی شەفافیەتی هەرێمی کوردستان هۆکاری نەناردنی موچەیە"

پەرلەمانتارێکی عێراق، کە وتەبێژی کوتلەی سادیقون (سەر بە قەیس خەزعەلی، سەرۆکی بزوتنەوەی عەسئیبی ئەهلی حەق)، ئاشکرایکرد، حکومەتی هەرێمی کوردستان شەفاف نییە و ئەوەش هۆکاری نەناردنی موچەی فەرمانبەرانە.

محەمەد کەریم ئەلبەلداوی، جێگری سەرۆکی لیژنەی پلاندانانی پەرلەمان، بە میدیاکانی راگەیاندووە، "مامەڵەکردن لەگەڵ حکومەتی فیدراڵی دەبێت لەسەر بنەمای شەفافیەت بێت، بەبێ ئەوەی پەنا بۆ شێوازی چەوت و تەمومژاوی ببرێت".

ئەلبەلداوی دەڵێت: "کاتێک حکومەتی هەرێم ناو و پەنجەمۆری هێزە سەربازییەکان نانێرێت بۆ بەغداد، ئەوە هەوڵێکە بۆ بەلاڕێدابردن و دەستکارییکردنی پرسە هەستیارەکان".

تەیف سامی، وەزیری دارایی عێراق، نزیکایەتی هەیە لەگەڵ عەسائیبی ئەهی حەق، هەروەها محەمەد کەریم ئەلبەلداوی، وتەبێژی فەرمیی عەسائیبە، پشتیوانی لەو رێوشوێنانە دەکات کە وەزارەتی دارایی عێراق لەبارەی موچەی موچەخۆرانی هەرێمەوە گرتویەتیەبەر.

ئەلبەلداوی جەختلەوە دەکاتەوە کە "هیچ نهێنییەک لە کارکردن لەگەڵ دامودەزگاکانی دەوڵەتدا نییە، حکومەتی هەرێم دەبێت نەرمیی بنوێنێت و بەرپرسیارانە مامەڵە بکات، بۆ ئەوەی کێشە هەڵپەسێردراوەکان چارەسەر بکات، دیارترینیان مەلەفی مووچەیە، کە کاریگەری لەسەر توێژێکی بەرفراوانی هاووڵاتیان هەیە".

ئەو پەرلەمانتارە هیچ ئاماژەیەکی دیکەی بە هەوڵەکان بۆ چارەسەرکردنی پرسی موچەی فەرمانبەرانی هەرێم نەکردووە، لەکاتێکدا دوو مانگە موچە و شایستە داراییەکانیان لە بەغدادەوە نەنێردراوە و پرسەکە بە هەڵپەسێردراوی ماوەتەوە.