هەواڵ

لەم راپۆرتەدا بزانە داننان بە فەڵەستین بەواتەی چی دێت

ئەمڕۆژانە زۆر گوێمان لەو وشەیە دەبێت، فڵانە و وڵات و فڵانە وڵات دانی بەدەوەڵەتی فەڵەستین-دا نا، لەم راپۆرتەدا بزانە مەبەست لە داننان بە فەڵەستین چییە؟

کۆمەڵەی گشتیی نەتەوە یەکگرتووەکان لە ساڵی 1947دا بڕیاری دابەشکردنی خاکی فەلەستینی دەرکرد، بەڵام ئێستا زیاتر لە 75٪ـی ئەندامی کۆمەڵەکە دانیان بە دەوڵەتی فەلەستین دا ناوە. 

193 وڵات ئەندامی نەتەوە یەکگرتووەکانن، زیاتر لە 145 وڵات دانیان بە دەوڵەتی فەلەستین دا ناوە. 

لەنێو ئەندامانی نەتەوە یەکگرتووەکان، هەر یەک لە فەرەنسا، بەریتانیا، ئەمریکا، رووسیا و چین؛ ئەندامی هەمیشەیی کۆمەڵەکەن. دوێنی بەریتانیا و ئەمڕۆش فەرەنسا دانیان بە دەوڵەتی فەلەستین دا نا. 

داناننان بە فەلەستین بە واتای چی دێت؟

- ئەو وڵاتانەی دانی پێدادەنێن، وەک دەوڵەتێکی سەربەخۆ و خاوەن سەروەری مامەڵەی لەگەڵ دەکەن، هەموو ئەو مافانەی لە یاسای نێودەوڵەتیدا هەن، بە فەلەستین رەوا دەبینن

- فەلەستین و ئەو وڵاتانە، باڵیۆزخانە لە پایتەختەکانی یەکدی دەکەنەوە

- رێکخراوی رزگاریخوازی فەلەستین لە ساڵی 1988 دەوڵەتی فەلەستینی راگەیاند

- ئێستا زیاتر لە 145 وڵاتی ئەندام لە نەتەوە یەکگرتووەکان دانی پێدا دەنێن

- ساڵی 2012، کۆمەڵەی گشتیی نەتەوە یەکگرتووەکان پێگەی فەلەستینی بەرزکردەوە بۆ "چاودێری نائەندام"

واتە فەلەستین دەتوانێت لە گفتوگۆ و پەیماننامەکانی نەتەوە یەکگرتووەکان بەشدار بێت و لە بارەگەی رێکخراوەکە نوێنەرایەتیی خۆی هەبێت، بەڵام مافی دەنگدان یان ئەندامێتیی تەواوەتی نییە

بۆ ئەوەی ببێتە ئەندامی تەواو لە نەتەوە یەکگرتووەکان، پێویستی بە دوو هەنگاوە:

یەکەم: بەدەستهێنانی رەزامەندیی ئەنجوومەنی ئاسایش

دووەم: بەدەستهێنانی دەنگی دوو لەسەر سێی کۆمەڵەی گشتیی نەتەوە یەکگرتووەکان

بەربەستی سەرەکی ئەنجوومەنی ئاسایشە

ئەمریکا بە بەکارهێنانی مافی ڤیتۆ، ناهێڵێت فەلەستین ببێتە ئەندامی هەمیشەیی لە UN، وەک چۆن لە نیسانی 2024 کردی.

ئەمریکا دەڵێت، دروستبوونی دەوڵەتی فەلەستین پێویستە لە ئەنجامی گفتوگۆی ئیسرائیلییەکان و فەلەستینییەکان بێت، بەڵام حکومەتی ئێستای ئیسرائیل هەڕەشە دەکات کە هەرگیز رێگە بە دروستبوونی دامەزراندنی فەلەستین نادات.

هەواڵ

محەمەد شیاع سودانی و نوری مالیکی سزرا دران

بەهۆی سەرپێچیکردن و دەستپێکردنی بانگەشەی پێشوەخت بۆ هەڵبژاردنی پەرلەمانی عێراق، هەریەک لە محەمەد شیاع سودانی، نوری مالیکی و موحسین مەندەلاوی لەلایەن کۆمیسیۆنی سەربەخۆی هەڵبژاردنەوەکانەوە سزادران.

بەگوێرەی نوسراوێکی ئەنجومەنی کۆمیسیارانی عێراق،23 کاندید و سەرکردەی سیاسی عێراق سەرپێچییان کردوە لە هەڵمەتی بانگەشەی هەڵبژاردن و بەهۆیەوە بە پێبژاردنی دوو ملیۆن دینار سزادراون و لەئەگەری دوبارەکردنەوەی سەرپێچییەکان، سزاکانیان بۆ دوو هێندە زیاد دەکات.
دیارترین ئەو کەسانەی لەلایەن کۆمیسیۆنەوە سزادراون، بریتین لەمانە:

محەمەد شیاع سودانی ⁄ سەرۆک وەزیرانی عێراق و سەرۆکی (هاوپەیمانی ئەعمار و تەنمییە )

نوری مالیکی⁄ سەرۆکی هاوپەیمانێتی دەوڵەتی یاسا

یاسر عیساوی⁄ سەرکردە لە حزبی تەقەدومی سەر بە حەلبوسی

سارە ئەیاد عەلاوی⁄ کچی سیاسەتمەدار ئەیاد عەلاوی

موسەننا سامەرایی⁄ سەرکردەی باڵای ھاوپەیمانی عەزم

محسن مەندەلاوی⁄ جێگری سەرۆک پەرلەمانی عێراق و سەرکردە لە هاوپەیمانی ئەساسی عێراقی

سابت عەباسی⁄ وەزیری بەرگری و سەرکردە لە هاوپەیمانی حەسم

بەھا ئەعرەجی ⁄ سیاسەتمەداری عێراقی