هەواڵ

"رێککەوتنمان لەگەڵ عێراق بۆ سێ مانگە"

وتەبێژی حکومەتی هەرێمی کوردستان رایگەیاند، لەگەڵ گەیشتنی مووچەی مانگی حەوت دابەش دەكەن و 120 ملیار دیناری داهاتی ناوخۆش دەنێرین بۆ بەغدا.

لەمیانی کۆنگرەیەکی رۆژنامەوانی-دا پێشەوا هەورامانی، وتەبێژی حکومەتی هەرێمی کوردستان لەبارەی دۆسیەی نەوت و رێککەوتنەکەیان لەگەڵ عێراق رایگەیاند، رێککەوتنەکەیان لەبارەی نەوتەوە لەگەڵ حکومەتی فیدراڵ بۆ ماوەی سێ مانگە.

ئاماژەی بەوەشکرد، لە ئێستادا توانای بەرهەمهێنانی نەوتی كوردستان 234 هەزار بەرمیلی رۆژانەیە و پێشبینی دەکەن لەماوەی 48 كاتژمێری ئایندەدا بابەتی هەناردەكردنەوەی نەوتی هەرێم چارەسەر ببێت.

لەبارەی رادەستکردنی نەوتیش، هەورامانی جەختی لەسەر ئامادەیی حکومەتی هەرێم کردەوە و وتی، حکومەتی هەرێمی کوردستان ئامادەیە لە پیشخابوور نەوت رادەستبکات.

لەبارەی داهاتی ناوخۆش رایگەیاند، حكومەتی هەرێم داوای بۆچوونی ئەنجومەنی دەوڵەتی نەكردووە لەبارەی داهاتە نانەوتییەكان.

هەواڵ

محەمەد شیاع سودانی و نوری مالیکی سزرا دران

بەهۆی سەرپێچیکردن و دەستپێکردنی بانگەشەی پێشوەخت بۆ هەڵبژاردنی پەرلەمانی عێراق، هەریەک لە محەمەد شیاع سودانی، نوری مالیکی و موحسین مەندەلاوی لەلایەن کۆمیسیۆنی سەربەخۆی هەڵبژاردنەوەکانەوە سزادران.

بەگوێرەی نوسراوێکی ئەنجومەنی کۆمیسیارانی عێراق،23 کاندید و سەرکردەی سیاسی عێراق سەرپێچییان کردوە لە هەڵمەتی بانگەشەی هەڵبژاردن و بەهۆیەوە بە پێبژاردنی دوو ملیۆن دینار سزادراون و لەئەگەری دوبارەکردنەوەی سەرپێچییەکان، سزاکانیان بۆ دوو هێندە زیاد دەکات.
دیارترین ئەو کەسانەی لەلایەن کۆمیسیۆنەوە سزادراون، بریتین لەمانە:

محەمەد شیاع سودانی ⁄ سەرۆک وەزیرانی عێراق و سەرۆکی (هاوپەیمانی ئەعمار و تەنمییە )

نوری مالیکی⁄ سەرۆکی هاوپەیمانێتی دەوڵەتی یاسا

یاسر عیساوی⁄ سەرکردە لە حزبی تەقەدومی سەر بە حەلبوسی

سارە ئەیاد عەلاوی⁄ کچی سیاسەتمەدار ئەیاد عەلاوی

موسەننا سامەرایی⁄ سەرکردەی باڵای ھاوپەیمانی عەزم

محسن مەندەلاوی⁄ جێگری سەرۆک پەرلەمانی عێراق و سەرکردە لە هاوپەیمانی ئەساسی عێراقی

سابت عەباسی⁄ وەزیری بەرگری و سەرکردە لە هاوپەیمانی حەسم

بەھا ئەعرەجی ⁄ سیاسەتمەداری عێراقی