هەواڵ

بانکی رافیدەین: کارتەکانی ماستەر و ڤیزا کارت لە دەرەوە وڵات کاردەکەن و دوای "پروپاگەندەی ئامانجدار" مەکەون

ئەمڕۆ، سەرجەم مامەڵە داراییەکانی بانکەکانی عێراق بە دراوی دۆلار لەگەڵ دەرەوەی وڵات راگیران و بڕیارە لە سبەی 1ی حوزەیرانەوە لەرێگەی بانکێکی دیکەوە کارەکان رێکبخرێت، بەڵام بانکی رافیدەین ئەو هەواڵانە رەتدەکاتەوە.
وەستانی مامەڵەکردن و راکێشانی دۆلاری بانکە عێراقییەکان لەدەرەوەی وڵات، گرفتی گەورە بۆ گەشتیاران و کۆمپانیا و مامەڵە داراییەکانی نێو تۆڕە کۆمەڵایەتییەکان دروستکردووە، ئەوەش ئەنجامی ئەو هۆشدارییە بوو کە مانگی رابردوو بانکی ناوەندی عێراق دابووی بە سەرجەم بانکەکان.
ئەمڕۆ، بانکی رافیدەین لە راگەیاندرواێکدا رەتیکردەوە مامەڵەکانی دۆلار بە (ماستەر و ڤیزاکارت) راگیرابن، بەڵکو لە ناوخۆ و دەرەوەی وڵات بێ گرفت کاردەکەن.
رافیدەین هەروەها نوسیویەتی: "داوا لە هاوڵاتیان دەكەین نەكەونە دوای پڕوپانگەندەی ئامانجدار".
رۆژی 23ی نیسان، مەحمود داغر، شارەزای دارایی و بەرپرسێكی پێشووی بانكی ناوەندیی عێراق ئاشکرایکرد، كە كاركردن بە ماستەر كارت و ڤیزا کارت لە دەرەوەی عێراق دەوەستن و ئەو بانكانە تەنیا بە دینار لە ناوخۆی عێراق دەتوانن کاربکەن.
ئەو لێدوانە دەنگوباسی زۆری بەدوای خۆیدا هێنا و بانکی رافیدەین رەتیکردەوە کە ئەو زانیارییانە راستبن، بەڵام دواتر دەرکەوت بەهۆی فشارەکانی وەزارەتی خەزێنەی ئەمریکا، دەبێت هەموو مامەڵەیەکی دۆلاری بانکە عێراقییەکان، لەرێگەی بانکێکی نێوەندگیری ئەمریکییەوە رێکبخرێت.
هەربۆیە بانکی بازرگانی عێراق پێشتر رایگەیاند، سەرجەم مامەڵە و راکێشانی دۆلار لە ئامێرەکانی ئەی تی ئێم-ەوە بۆ (ڤیزا و ماستەرکارت) لە دەرەوەی عێراق راگیراون.

شەوی رابردوو، بانکی (بانکی یەکەمی عێراق- ئێف ئای بی) ئاگادارییەکی لە ئەپڵیکەیشن و خزمەتگوزارییەکانی خۆیدا بۆ بەشدارەکانی بڵاوکردەوە و تیایدا هاتووە: "پێتان رادەگەیەنین، ئەژمارەکانی بانکەکەمان بەشێوەیەکی کاتی کارناکات بۆ مامەڵە نێودەوڵەتییەکان و سەرجەم خزمەتگوزارییەکانی دیکەی بانکەکەمان بۆ لەناوخۆی وڵاتدا وەکو خۆی کاردەکەن".

ئەگەرچی باسی ئەوە دەکرێت بانکی ناوەندی عێراق، بڕیاریداوە لە رۆژی 1ی حوزەیرانەوە مامەڵەی دۆلاری سەرجەم بانکەکانی عێراق بە رێگای ئەژماری بانکی (سویچ - SWITCH)ەوە دەبن، بەڵام تا ئێستا رونکردنەوەیەکی یەکلاکەرەوە لەلایەن حکومەتی عێراقەوە لەوبارەیەوە دەرنەچووە.
ئەوەی لەواقعدا هەیە مامەڵە داراییەکان بە دۆلار لە دەرەوەی عێراق راگیراون و بانکەکانیش خۆیان پشتڕاستیانکردووەتەوە، بەڵام بانکی رافیدەین لێدوانی پێچەوانەی هەیە و نازانرێت ناکۆکییەکە چۆن بەلادا دەکەوێت.

تەندروستی

بەکارهێنانی مەیکەپی دژە ئاو مەترسیدارە؟

توێژینەوەیەک کە لە گۆڤاری زانستی ژینگە و تەکنۆلۆژیادا بڵاو کراوەتەوە ئاماژەی بەوە داوە، بەشێک لە بابەتی جوانکارییەکان کە ئەمڕۆ بەکار دێت، ڕێژەیەکی زۆر لە ماددە کیمیایییە ژەهراوییەکان لە پێکهاتەیاندا هەیە وەک پۆڵی فلۆرۆ ئەڵکیل (PFAS ) . کە بەداخەوە لە پێکهاتەی ماددە جوانکارییەکاندا ئەم ماددە نانووسرێت بۆ ئەوەی خەڵک هۆشیار بێت.

ئیدارەی خۆراک و دەرمانی ئەمریکی (FDA) باس لەوە دەکات، بەشێک لە بابەتە جوانکارییەکانی وەکوو بۆیەی نینۆک و کرێمەکان و سوراو و قەڵەم چاو و ماسکەرا، دەکرێت ئەم ماددانەی تێ بکرێت بۆ ئەوەی زۆرتر بە درەوشاوەیی دەربکەوێت. بۆیە زۆر گرنگە ئەو بابەتە جوانکارییانە بەکار دێت کە دڵنیان لەوەی ئۆریجیناڵە و کوالێتی بەرزە.