هەواڵ

سبەی دەستدەکرێت بە وەرگرتنی گەنمی جوتیاران

بەپێی رێنماییەکانی وەزارەتی بازرگانی عێراق، بڕیارە لە رۆژی 10ی حوزەیرانەوە دەستبکرێت بە وەرگرتنی گەنمی جوتیارانی پارێزگای سلێمانی، بەپێی ئەو بڕ و کواڵیتیەی بۆیان دەستنیشانکراوە.

به‌ڕێوه‌به‌رایه‌تی بازرگانی دانه‌وێڵه‌ی سلێمانی، شه‌ش خاڵ وه‌ك مه‌رج بڵاوده‌كاته‌وه‌ و به‌پێی مه‌رجه‌كانیش، جوتیاران ئۆتۆمبێله‌ بارهه‌ڵگره‌كانیان به‌یه‌ك ڕیز ڕابگرن و ده‌بێت سه‌رجه‌م ئۆتۆمبێله‌كان پڕ بن له‌ دانه‌وێڵه‌.

نەوزاد شێخ کامیل، بەڕێوەبەری گشتیی بازرگانی و پیشەسازیی حکوومەتی هەرێمی کوردستان، پێشتر ئاشکرایکردبوو رۆژی 10ی حوزەیران دەستدەکرێت بە وەرگرتنی گەنم لە جوتیارانی هەرێم و بڕیارە ئەمساڵ تەنها 400 هەزار تۆن گەنم وەربگیرێت لەکاتێکدا ساڵی رابردوو 700 هەزار تۆن وەردەگیرا.

بەڕێوەبەری گشتیی بازرگانی و پیشەسازیی دەڵێت: ئەمساڵ سایلۆ نوێیەکان هاوشان لەگەڵ سایلۆکانی دیکەی هەرێمی کوردستان، گەنم وەردەگرن، وەک قوشتەپە، گەرمیان و ڕوڤیا.

ساڵی رابردوو توانرا زیاتر لە 685 هەزار تۆن لە جوتیارانی هەرێم وەربگیرێت و بڕێکی زۆر گەنم کە وەرنەگیرابوون لەبەرئەوەی کە مەرجەکانیان تێدانەبووە.

سایلۆی سلێمانی له‌ ناحیه‌ی پیره‌مه‌گرون سه‌ر به‌ به‌ڕێوه‌به‌رایه‌تی بازرگانی دانه‌وێڵه‌ی سلێمانی له‌ ئاگادارینامه‌یه‌كدا بڵاویكرده‌وه‌، ئاگاداری جوتیاران ده‌كه‌ین سبه‌ی سێشه‌مه‌ ده‌ست به‌ پرۆسه‌ی به‌ بازاڕكردنی گه‌نمی جوتیاران ده‌كرێت بۆ وه‌رزی بەرهەمهێنانی 2025، ئه‌مساڵیش وه‌ك ساڵی ڕابردو گه‌نم وه‌رگرتن به‌ ناوچه‌ ناوچه‌یه‌، بۆیه‌ داواكارین له‌ جوتیاران تكایه‌ ڕه‌چاوی ئه‌م خاڵانه‌ی خواره‌وه‌ بكه‌ن:
یه‌كه‌م:
سبه‌ی ته‌نها جوتیارانی سنوری هه‌ر دو به‌شی كشتوكاڵی پیره‌مه‌گرون و تانجه‌رۆ(عه‌ربه‌ت)  گه‌نمه‌كانیان بێنن جگه‌ له‌ جوتیارانی ئه‌و دو به‌شه‌ كشتوكاڵیه‌ هیچ  جوتیارێك له‌ به‌شه‌ كشتوكاڵیه‌كانی تر ئوتومبێله‌ بارهه‌ڵگره‌كانیان ڕانه‌گرن.
دوه‌م:
جوتیاران ئۆتۆمبێله‌ بارهه‌ڵگره‌كانیان به‌ یه‌ك ڕیز ڕابگرن و ده‌بێت سه‌رجه‌م ئۆتۆمبێله‌كان پڕ بن له‌ دانه‌وێڵه‌ و به‌ پێچه‌وانه‌وه‌ باج به‌ دو ڕیز و به‌ هیچ ئۆتۆمبێلێكی به‌تاڵ و نیوه‌ نادرێت . 
سێیه‌م:
تراكتۆره‌كان لای دیواری سایلۆوه‌ بۆ سه‌ره‌وه‌ بۆ لای سه‌ربڕخانه‌كه‌ی پیره‌مه‌گرون به‌ یه‌ك ڕیز بوه‌ستن و پێویسته‌ دانه‌وێڵه‌یان پێ بێت به‌ پێچه‌وانه‌ی ڕێنماییه‌كان باج به‌ هیچ تراكتۆرێك نادرێت. 
چواره‌م:
بۆ هه‌ر بارهه‌ڵگرێك پێویسته‌ ته‌نها شۆفێری بارهه‌ڵگره‌كه‌ بێته‌ ژوره‌وه‌ بۆ ڕاییكردنی مامه‌ڵه‌كان هیچ بارهه‌ڵگرێك نابێت له‌یه‌ك كه‌س زیاتری له‌گه‌ڵ بێت . 
پێنجه‌م:
وه‌ك تێبینی كراوه‌، خاوه‌ن ئۆتۆمبێله‌ بارهه‌ڵگره‌كان به‌ پلێت و ئاسان بۆدی  گه‌ڵابه‌كانیان به‌رزكردوه‌ته‌وه‌، بۆ ئه‌وه‌ی دانه‌وێڵه‌ی زیاتری لێ بار بكرێت، بۆیه‌ هه‌ربارهه‌ڵگرێك، به‌شێوه‌یه‌ك به‌رزی كردبێته‌وه‌ كه‌ ئامێری ڕاكێشانی گه‌نم بۆ پشكنین نه‌گانه‌ بنی بۆدیه‌كه‌، گه‌نمه‌كه‌ی لێ وه‌رناگیرێت.
شه‌شه‌م:
داواكارین له‌ جوتیاران گه‌نمه‌كانیان ته‌نها له‌و بارهه‌ڵگرانه‌ باركه‌ن كه‌ خۆیان هه‌ڵی ده‌ڕێژن واته‌ قلابن، به‌ پێچه‌وانه‌وه‌ گه‌نمیان لێ وه‌رناگیرێت.

هەواڵ

فڕۆکەیەک لە فڕۆکەخانەی بەغداد ئاگریگرت

نیوەڕۆی ئەمڕۆ، 9ی حوزەیران، فڕۆکەیەکی مەدەنی لەناو فڕۆکەخانەی بەغداد ئاگری گرت، پاش ئەوەی ژمارەیەکی زۆر گەشتیاری لە بەیروتی پایتەخی لوبنانەوە گواستبویەوە بۆ شاری بەغداد.

کەناڵی روسیا تودەی، ئاشکرایکردووە، ئەو فڕۆکەیە پاش ئەوەی لە فڕۆکەخانەی بەغداد نیشتووەتەوە، سەرنشینەکانی داگرتووە کە زیارەتکاری شیعە بوون و لە لوبنانەوە سەردانی بەغدادیان کردووە.

بڕیارە لە چەند رۆژی داهاتوودا رێورەسمەکانی مەراسیمی غەدیر بەڕێوەبچێت کە ساڵانە لە مەزارگە و شوێنە ئاینییە پیرۆزەکانی ئاینزای شیعە بەڕێوەبچێت.

ئیدارەی فڕۆکەخانەکانی عێراق، لە بەیاننامەیەکدا ئاماژەی بەوەکردووە کە فڕۆکەکە سەر بە هێڵێ ئاسمانی ئور بووە و کاتێک ویستویەتی بفڕێت دوچاری کێشەی تەکنیکی بووە و زۆر بە خێرایی توانراوە ئاگرەکە کۆنترۆڵبکرێت و فڕۆکەی بەدیل بۆ گەشتەکە دابینکراوە.

هەروەها جەخت لەوەکراوەتەوە کە بەهۆی روداوەکەوە هیچ گەشتێک دوانەکەوتووە و تەندروستی سەرجەم سەرنشینەکان باش بووە و گەشتەکەیان ئەنجامداوە.