هەواڵ

لە مانگی تەموزەوە پارەدان لە فەرمانگەکان بە کاش ئەنجامنادرێت

راوێژکارێکی سەرۆکوەزیرانی عێراق، ئاشکرایکرد، حکومەتی عێراق چەندین رێکاری نوێ و بەرفراوانی گرتووەتەبەر بۆ کەمتر بەکارهێنانی پارەی کاش و هاندانی خەڵک بۆ بەکارهێنانی سیستمی بانکی.

ساڵح سەلمان، راوێژکاری سەرۆکوەزیرانی عێراق، بە ئاژانسی هەواڵی عێراقی (INA)ی راگەیاندووە، "لە سەرەتای مانگی داهاتوودا پارەدان بە کاش لە دامودەزگا حکومییەکان قەدەغەدەکرێت و دەبێت هەموو کەسێک کارتی بانک بەکاربهێنێت".

حکومەتی عێراق کۆمپانیای ئێرنست ئەند یۆنگی ڕاسپاردووە بۆ دووبارە رێکخستنی کارەکانی ٦-٧ بانکی دەوڵەتی لەناوخۆی عێراقدا، بەمەبەستی ئاسانکاریی بۆ بەڕێوەچوونی مامەڵە بە کارتی بانکەکان و "ئێستا عێراق هاوکاری نزیکەی 30 بانکی بیانی دەکات".

ساڵح سەلمان، وتی: "عێراق پێشکەوتنی بەرچاوی بەدەستهێناوە لە جێبەجێکردنی سیستەمی پارەدانی ئەلیکترۆنی و ژمارەی هەژماری بانکی کارپێکراو گەیشتووەتە 22-23 ملیۆن کارتی بانکی.

هەواڵ

فڕۆکەیەک لە فڕۆکەخانەی بەغداد ئاگریگرت

نیوەڕۆی ئەمڕۆ، 9ی حوزەیران، فڕۆکەیەکی مەدەنی لەناو فڕۆکەخانەی بەغداد ئاگری گرت، پاش ئەوەی ژمارەیەکی زۆر گەشتیاری لە بەیروتی پایتەخی لوبنانەوە گواستبویەوە بۆ شاری بەغداد.

کەناڵی روسیا تودەی، ئاشکرایکردووە، ئەو فڕۆکەیە پاش ئەوەی لە فڕۆکەخانەی بەغداد نیشتووەتەوە، سەرنشینەکانی داگرتووە کە زیارەتکاری شیعە بوون و لە لوبنانەوە سەردانی بەغدادیان کردووە.

بڕیارە لە چەند رۆژی داهاتوودا رێورەسمەکانی مەراسیمی غەدیر بەڕێوەبچێت کە ساڵانە لە مەزارگە و شوێنە ئاینییە پیرۆزەکانی ئاینزای شیعە بەڕێوەبچێت.

ئیدارەی فڕۆکەخانەکانی عێراق، لە بەیاننامەیەکدا ئاماژەی بەوەکردووە کە فڕۆکەکە سەر بە هێڵێ ئاسمانی ئور بووە و کاتێک ویستویەتی بفڕێت دوچاری کێشەی تەکنیکی بووە و زۆر بە خێرایی توانراوە ئاگرەکە کۆنترۆڵبکرێت و فڕۆکەی بەدیل بۆ گەشتەکە دابینکراوە.

هەروەها جەخت لەوەکراوەتەوە کە بەهۆی روداوەکەوە هیچ گەشتێک دوانەکەوتووە و تەندروستی سەرجەم سەرنشینەکان باش بووە و گەشتەکەیان ئەنجامداوە.