هەواڵ

لەهەرێمی كوردستان نزیكەی 500 كەس سزای لەسێدارەدانیان هەیە و چاكسازییان بۆ دەكرێتەوە

وەزیری كار و كاروباری كۆمەڵایەتیی هەرێمی كوردستان ئاشكرایكرد، چاكسازییەكی نوێ بۆ ئەو كەسانە دروست دەكرێت كە بە ماددەی تیرۆر دەستگیركراون یاخود بڕیاری لەسێدارەدانیان بۆ دەركراوە. 
كوێستان محەممەد، وەزیری كار و كاروباری كۆمەڵایەتیی هەرێمی كوردستان لەبارەی دۆخی چاكسازییەكان، چڕی و زۆریی ژمارەی گیراوان لە چاكسازییەكان، بڕیاری لێبوردنی گشتی و پڕۆژەی قەرزی بچووك بۆ گەنجان، رایگەیاند: چاكسازییەكی نوێ دروست دەكەین بۆ ئەو كەسانەی كە بە ماددەی تیرۆر دەستگیركراون.
 وەزیری كار و كاروباری كۆمەڵایەتی وتیشی: ئەو سێ چاكسازییەكەی گەوران هەریەكێكیان بۆ 900 كەس دروستكراون، بەڵام ئێستا ژمارەیان دوو ئەوەندە و سێ ئەوەندە زیادی كردووە، داوامان كردووە چاكسازییەكی دیكەی گەوران دروستبكرێت بۆ ئەو كەسانەی بە ماددەی تیرۆر دەستگیركراون یان بڕیاری لەسێدارەدانیان بۆ دەركراوە.
كوێستان محەممەد دەشڵێت: سەرۆكی حكومەت بڕیاری دروستكردنی چاكسازییەكەی داوە، بەڵام هێشتا شوێنەكە یەكلانەكراوەتەوە، هەروەها سێ چاكسازی ژنان و منداڵانیش هەن، شوێنی ئەوانیش بچووك و خراپە، بۆیە دەستمانكردووە بە دروستكردنی چاكسازیی ژنانی هەولێر، بڕیارە بۆ سلێمانی و دهۆكیش دروستبكرێت. 
سەبارەت بە دەركردنی لێبووردنی گشتی  كوێستان محەممەد رایگەیاند: لیژنەیەكی باڵا پێكهێندراوە و لە قۆناغی تاوتێكردندایە،لێبوردنی تایبەت لە دەسەڵاتی سەرۆكی هەرێمی كوردستانە و لێبووردنی گشتیش لە دەسەڵاتی پەرلەمانی كوردستانە.
لەبارەی گیراوانی بادینانیشەوە وەزیری كاروباری كۆمەڵایەتی وتی: دۆسیەكانی گیراوانمان بۆ داواكاری گشتی ناردووە دادگا بڕیاردەدات ئازادكردنی مەرجدار دەیانگرێتەوە یان نا.
رۆژی 19-4-2021، وەزیری كار و كارورباری كۆمەڵایەتی لە كۆنگرەیەكی رۆژنامەوانیدا لەگەڵ وەزیری تەندروستیی هەرێمی كوردستان رایگەیاند: بڕیارمانداوە سێ نەخۆشخانەی دەروونیی تایبەت بە ژنان دروستبكەین. 
وەكو كوێستان محەممەد دەڵێت: لە سلێمانی بینای نەخۆشخانەكە ئامادەیە، لە هەولێریش نەخۆشخانەیەك هەیە، بەڵام پێویستی بە نۆژەنكردنەوەیە و وەزارەتی دارایی پارەی بۆ تەرخانكردووە، لە دهۆكیش بینای نەخۆشخانەیەك هەیە كە شارەوانی تێدایە، ئاگاداركراونەتەوە چۆڵی بكەن، چونكە باڵەخانەكە تایبەتە بە وەزارەتی تەندروستی و بۆ نەخۆشخانە دەروونییەكە تەرخانكراوە.
وتیشی: دەتوانم بڵێم ئەمساڵ بەدڵنیاییەوە لە سلێمانی دەكرێتەوە، بەڵام بۆ هەولێر و دهۆك كەوتووەتە سەر بیناكانیان.
 بەوتەی ئیحسان عەبدولڕەحمان، بەڕێوەبەری گشتیی چاكسازییەكانی هەرێمی كوردستان، لە هەرێم شەش چاكسازی هەن كە سیانیان چاكسازیی گەورانن،لەكاتێكدا لە هەرێمی كوردستان تەنیا ئەوانەی سزای لەسێدارەدانیان هەیە و لە زینداندان، نزیكەی 500 كەسن.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.