تەندروستی

دژە شێرپەنجەیە; سوودەکانی خواردنی توو بۆ جەستە

بەپێی ماڵپەڕی "هێڵث شۆت"، بەشێک لەو تایبەتمەندییانەی لە توودا هەنو بەسوودن بۆ جەستە بریتین لە:
١. بوونی دژە ئۆکسانەکان، توو رێژەیەکی زۆر دژە ئۆکسێنەری تێدایە، کە یارمەتی بەرگریکردن لە جەستەت دەدات لە دژی وردە زیندەوەرە زیانبەخشەکان.
٢. تایبەتمەندی دژە پیربوون، پرۆسەی پیربوون پەیوەندییەکی نزیکی لەگەڵ فشاری ئۆکسجینی و هەوکردن هەیە، بە بەرەنگاربوونەوەی فشاری ئۆکسجینی تایبەتمەندی دژە پیربوونی توو رەنگە یارمەتی خاوکردنەوەی پیربوونی خانەکان و شانەکان بدات، ئەمەش پێستێکی تەندروست و گەنجت پێ دەبەخشێت.
٣. رێگری دەکات لە هەوکردنی بۆری میز، هەوکردنی بۆری میز حاڵەتێکی باوە بەتایبەت لای خانمان، هەروەها توو وەک چارەسەرێکی سروشتی بۆ رێگریکردن لە هەوکردنی کۆئەندامی میز ناو دەبرێت.
٤. پاڵپشتی تەندروستی دڵ دەکات، نەخۆشییەکانی دڵ هۆکاری سەرەکی مردنە لە سەرانسەری جیهاندا، خواردنی توو رەنگە یارمەتیدەر بێت بۆ تەندروستی دڵ، ئەمەش بەهۆی رێژەی دژە ئۆکسێنەری وەک ئەنتۆسیانین و پرۆئانتۆسیانین و کوێرسیتین.
٥. لە هەندێک جۆری شێرپەنجە دەتپارێزێت، توو دەتوانێت لە مەترسی تووشبوون بە هەندێک جۆری شێرپەنجە بتپارێزێت، دژە ئۆکسێنەرەکانی ناوی نەک تەنها بەرەنگاریی فشاری ئۆکسجین دەبنەوە، بەڵکو تایبەتمەندی دژە شێرپەنجەیان هەیە.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.