هەواڵ

رۆژنامەنوس سلێمان ئەحمەد دادگایی دەكرێت بە هەمان ئەو یاسایەی رۆژنامەنوسانی بادینانی پێ حوكمدرا

دادگای دهۆك 30ی حوزەیرانی ئەمساڵی دیاریكرد بۆ دادگاییكردنی رۆژنامەنوس سلێمان ئەحمەد، ئەوەش دوای 220 رۆژ دێت لە دەستگیركردنی ناوبراو، بە هەمان ئەو یاسایەش دادگاییدەكرێت كە رۆژنامەنوسان و چالاكوانانی بادینانی پێ سزادرا.
رێڤێنک یاسین، پارێزەر و ئەندامی تیمی بەرگریكردن لە دۆسیەی رۆژنامەنوس سلێمان ئەحمەد بە (كەركوك ناو)ی وت "دادگا ئاگاداریكردینەوە كە 30ی حوزەیرانی ئەمساڵی دیاریكردووە، بۆ بەڕێوەچونی یەكەم دانیشتنی دادگاییكردنی رۆژنامەنوس سلێمان ئەحمەد"، جەختیكردەوە "ئەوە دوای ئەوە دێت كە دوای حەوت مانگ لە دەستگیركردنی توانیمان بیبینین و بریكارنامەی لێ وەربگرین بۆ ئەوەی بەشێوەیەكی فەرمی ببینە پارێزەری".
رێڤێنک یاسین جەختیكردەوە كە سلێمان ئەحمەد بەپێی ماددەی یەكی یاسای ژمارە 21ی ساڵی 2003 دادگایی دەكرێت، "ئەو ماددەیە تایبەتە بەو کەسانەی ئەمنییەتی هەرێمی کوردستان تێکدەدەن".
حكومەتی هەرێمی كوردستان لە ساڵی 2023دا زیاتر لە 50 چالاكوان، رۆژنامەنوس، مامۆستا و کەسی دیكەی بە هەمان یاسا روبەڕوی دادگا كردۆتەوە و تائێستا پێنج كەس بەو یاسایە سزای زیندانییان بەسەردا سەپێنراوە، لەوانەش رۆژنامەنوسان و چالاكوانانی بادینان و لە دیارترینیان رۆژنامەنوس شێروان شیروانی.
یاسای ژمارە 21 هەمان ئەو ماددەیە یاساییەیە، بەر لە ساڵی 2003 و بە گۆڕانكارییەكی كەمەوە سەدام حسێن، وەك سەرۆكی ئەنجومەنی سەركردایەتی شۆڕش بەسەر پێشمەرگە و ئۆپۆزسیۆنی رژێمەكەیدا جێبەجێیدەکرد.
رێڤێنک یاسین وتی "ئێمە بە هەموو شێوەیەک بەرگری لە سلێمان ئەحمەد دەكەین، خۆمان بەباشی ئامادەکردووە تا لە رۆژی دادگاییکردنەکەیدا شتێکی باشی بۆ بکەین".
یاسای ژمارە 21 لە 27ی ئەیلولی 2003، لە دانیشتنێكی ئاسایی پەرلەمانی كوردستاندا بەسەرۆكایەتی رۆژ نوری شاوەیس دەركراوە و ئامانج لێی لەكارخستنی چەند ماددەیەكی یاسای سزادانی عیراقی بووە.
ئەو یاسایە لە شەش ماددە پێكهاتووە، لە ماددەی یەكەمیدا جێگرەوەیەك بۆ ماددەی 156ی یاسای سزادانی عیراقی دانراوە و هاتووە "هەركەسێ بە دەستی ئەنقەست و بە هەر شێوەیەك دەبێ، ببێ‌ لە كارێكدا تێوەگلێ بە مەبەستی زیاندان لە ئاسایش و سەقامگیری و سەروەریی دامودەزگاكانی هەرێمی كوردستانی عێراق و ببێتە هۆی كەوتنەوەی ئەو زیانە، بە بەندكردنی هەتا هەتا یان بە بەندكردنی كاتی سزادەدرێت".
یاساكە لە ژمارە 45ی رۆژنامەی وەقایعی كوردستان لە 28ی تشرینی یەكەمی 2003دا بڵاوكراوەتەوە و لەوكاتەوە تائێستا بەركارە.
سلێمان ئەحمەد، كە وەكو هەواڵساز لە بەشی عەرەبی دەزگای رۆژنیوز كاردەكات، لە 25ی تشرینی یەكەمی 2023دا لەكاتی گەڕانەوەیدا له‌ رۆژئاوای كوردستان (سوریا) بۆ هەرێمی كوردستان له‌ ده‌روازه‌ی فیشخابوور (سێمێلكا) دەستگیركرا.
هەرچەندە پارێزەر و ئەندامانی تیمی بەرگریكردن لە دۆسیەی رۆژنامەنوس سلێمان ئەحمەد دەیانجار داوایان لە ئاسایش كرد بۆ ئەوەی سلێمان ببینن تا لانیكەم بۆ بەرگریكردن لێی بریكارنامەی پارێزەری پێ واژۆ بكەن، بەڵام ئاسایش دەیوت لای ئەوان نییە. تاوەكو كۆتایی مانگی رابردوو ئاكرایان كرد كە لای ئەوان دەستگیركراوە.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.