تەندروستی

‌عەقڵی‌ بەئاگا و نائاگا جیاوازیان چییه‌؟

دكتۆر جه‌عفه‌ر پزیشکی پسپۆری دەروونی ده‌ڵێت" زانایانی‌ دەرونناس عەقڵی‌ مرۆڤ دەکەنە دووبەش، عەقڵی‌ بەئاگا و عەقڵی‌ نائاگا، عەقڵی‌ نائاگا بەرپرسە لە رێکخستنی‌ بەرێوەچوونی‌ ئیشوکاری‌ زۆربەی‌ ئەندامەکانی‌ لاشە وەکو کۆئەندامی‌ هەرس، دەمار، هەناسەدان، وە بەشێک لە زانایان بەوە پێناسەی‌ دەکەن کە "وەکو منداڵێک وایە هەموو شتێک کە پێیدەوترێت بەراستی‌ دەزانێت بەبێ هیچ دوو دڵی و گومانێک" لەگەڵ ئەوەشدا توانایەکی‌ بەهێزی‌ هەیە کە مرۆڤ والێدەکات بە وزە و هێزێکی‌ زۆرەوە بەرەو بەدەستهێنانی‌ ئامانجەکانی‌ بڕوات هەرچەند ئەو ئامانجانە قورس و گران بن.


لەبەرئەوە مرۆڤ هەرچەندە لەگەڵ دەرونی‌ خۆی‌ بدوێت بە وتنی‌ وشەی‌ ئەرێنی، هەموو ئەو ئاماژانە وەردەگرێت و دەستدەکات بە ئامادەکردنی‌ عەقڵی‌ بەئاگا و ئەندامەکانی‌ لاشە بۆ کارکردن بە ئاراستەی‌ ئەوانەی‌ پێیوتراوە.


هەرچی‌ عەقڵی‌ بەئاگاشە، بەرپرسە لە ئەنجامدانی‌ کارە رۆژانەییەکان و بەئاگایی‌ ئێمە و فێربوون و هەڵگرتنی‌ زانیارییەکان. 


هەردوو ئاستەکەی عەقلمان کاریگەرییان هەیە لەسەرمان و ژیانمان ئاراستە دەکەن، بەلام زۆرجار ئێمە بێئاگاین لە کاریگەرییە بەهێزەکەی عەقلی نائاگامان و دەرئەنجام دەبینە قوربانی و نازانین چۆن خۆمان رزگاربکەین. 

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.