هەواڵ

گەرووى هورمز دابخرێت هەناردەی نەوتی هەرێم دەستپێدەکاتەوە

لەگەڵ گەرمبوونی هێرشەکانی ئیسرائیل و ئێران بۆسەر یەکتری، مەترسیی داخستنی گەرووی هورمز هەیە، گەرووی هورمز، ئەو ڕێڕەوە ئاوییە تەسکەی کە کەنداوی فارس بە دەریای عومان و زەریای هیندەوە دەبەستێتەوە، تەنها خاڵێکی جوگرافی نییە، بەڵکو شادەماری وزەی جیهانە. 

رۆژانە نزیکەی 21 ملیۆن بەرمیل نەوت بەم گەرووەدا تێدەپەڕێتو ئەمەش دەکاتە نزیکەی 20 بۆ 21%ـی کۆی بەکاربردنی نەوتی جیهان و نزیکەی یەک لەسەر سێی کۆی بازرگانیی نەوتی دەریایی، زیاتر لە یەک لەسەر سێی گازی سروشتیی شلی جیهان (LNG) لە ڕێگەی هورمزەوە هەناردە دەکرێت، کە قەتەر گەورەترین هەناردەکاریەتی.

گەورەترین کڕیارانی نەوتی کەنداو، وڵاتانی ئاسیان. چین، هیندستان، ژاپۆن، و کۆریای باشوور بە ڕێژەیەکی زۆر پشت بەم نەوتە دەبەستن کە لە هورمزەوە دێت، داخستنی ئەم گەرووە، واتە وشککردنی ئەم سەرچاوە زەبەلاحەی وزە بۆ بازاڕەکانی جیهان.

پێشبینی دەکرێت، لە یەکەم هەفتەی داخستنیدا، نرخی یەک بەرمیل نەوتی برێنت بە ئاسانی لە 150 دۆلار تێپەڕێتو ئەگەر قەیرانەکە درێژە بکێشێت، نرخەکان دەتوانن بگەنە ئاستی 200 بۆ 250 دۆلار یان زیاتریشو ئەمە بەرزترین ئاستی مێژوویی دەبێت.

لەناکاو بازاڕی جیهان ڕۆژانە 21 ملیۆن بەرمیل نەوتی کەم دەکا،. هیچ وڵاتێک، تەنانەت ئەمریکا و سعودیەش، ناتوانن لە ماوەیەکی کورتدا ئەم بۆشاییە پڕ بکەنەوە.

نرخی بەرزی نەوت ڕاستەوخۆ دەبێتە هۆی بەرزبوونەوەی نرخی سووتەمەنی، کارەبا، و تێچووی گواستنەوە، ئەمەش کاریگەری لەسەر نرخی هەموو کاڵا و خزمەتگوزارییەک دادەنێت و شەپۆلێکی توندی هەڵاوسان دروست دەکات.

بۆ عێراق، داخستنی گەرووی هورمز کەمتر نییە لە کارەساتێکی ئابووریی نیشتمانی، چونکە :عێراق رۆژانە نزیکەی 3.3 ملیۆن بەرمیل نەوت هەناردە دەکاتو زیاتر لە 95%ی ئەم نەوتە لە ڕێگەی بەندەرەکانی باشوور (بەسرە و خۆر ئەلعەمیە) و پاشان گەرووی هورمزەوە دەچێتە بازاڕەکانی جیهان.

داخستنی گەرووەکە بە واتای وەستانی نزیکەی تەواوی هەناردەی نەوتی عێراق دێتو لەبەر ئەوەی 90%ـى ی بودجەی عێراق پشت بە داهاتی نەوت دەبەستێت، ئەمە دەبێتە هۆی: ناتواناییی حکومەت لە دابینکردنی مووچەی فەرمانبەران و خانەنشینان، وەستانی تەواوی پڕۆژە خزمەتگوزاری و وەبەرهێنانەکان،  زیادبوونی مەترسیی نائارامیی کۆمەڵایەتی و سیاسی لە شارەکانی باشوور و ناوەڕاست.

لێرەدا هاوکێشەکە ئاڵۆزتر دەبێت، هەرێمی کوردستان وەک بەشێک لە عێراق زیانی بەردەکەوێت، بەڵام لە هەمان کاتدا کارتی فشارێکی گرنگی بەدەستەوە دەبێت.

لە حاڵەتی وەستانی داهاتی نەوتی عێراق، حکومەتی فیدراڵی ناتوانێت پشکی هەرێم لە بودجە و مووچە بنێرێت، بەڵام لەلایەکی ترەوە، داخستنی گەرووی هورمز، بۆریی نەوتی هەرێمی کوردستان بۆ بەندەری جەیهانی تورکیا دەکاتە تاکە دەرچەی سەرەکی و ستراتیژی بۆ هەناردەکردنی نەوتی عێراق و کوردستان

دوای داخستنی گگەرووەکە، حکومەتی فیدراڵی، هیچ بژاردەیەکی تری لەبەردەمدا نامێنێت جگە لەوەی بە پەلە ڕێککەوتنێکی نوێ لەگەڵ هەولێر بکات بۆ دەستپێکردنەوەی هەناردەی نەوت لە ڕێگەی تورکیاوە، ئەو کێشە سیاسی و یاساییانەی کە پێشتر ڕێگربوون (وەک بڕیاری دادگای پاریس)، لەبەردەم مەترسیی لەناوچوونی دەوڵەتدا بێ بایەخ دەبن.

حکومەتی هەرێمی کوردستان دەکەوێتە پێگەیەکی دانوستانکاری زۆر بەهێزەوەو دەتوانێت مەرجی خۆی بسەپێنێت بۆ مسۆگەرکردنی مافە دەستوورییەکانی، پشکی بودجە، و چارەسەرکردنی کێشەی تێچووی بەرهەمهێنان و فرۆشتنی نەوت.

بۆری جەیهان، بۆرییەکە توانای هەناردەکردنی نزیکەی 450 هەزار بەرمیل لە نەوتی هەرێم و نزیکەی 400 هەزار بەرمیل لە نەوتی کەرکوکی هەیە لە ڕۆژێکدا، هەرچەندە ئەم بڕە (نزیکەی 850 هەزار بەرمیل لە ڕۆژێکدا) جێگەی 3.3 ملیۆن بەرمیلی باشوور ناگرێتەوە، بەڵام تاکە سەرچاوەی داهاتی دۆلاری دەبێت بۆ عێراق لەو کاتەدا و دەتوانێت لە داڕمانی تەواو ڕزگاری بکات.

داخستنی گەرووی هورمز بەهۆی شەڕی ئێران و ئیسرائیلەوە، سیناریۆیەکی کارەساتبارە، کە دەبێتە هۆی شۆکێکی گەورە بۆ بازاڕی وزەی جیهان، بەرزبوونەوەی بێوێنەی نرخەکان، و ئەگەری داکشانێکی ئابووریی جیهانی. عێراق، بەهۆی پشتبەستنی تەواوی بە بەندەرەکانی باشوور، ڕووبەڕووی مەترسیی داڕمانی ئابووری و نائارامیی کۆمەڵایەتی دەبێتەوە.

بەڵام لەناو دڵی ئەم قەیرانە گەورەیەدا، هەلێکی ستراتیژیی مێژوویی بۆ هەرێمی کوردستان دێتە ئاراوە، داخستنی هورمز، بۆریی نەوتی کوردستان-جەیهان دەکاتە گرنگترین و تاکە ڕێگای هەناردەی نەوتی عێراق. ئەمەش کارتی فشارێکی زۆر بەهێز دەداتە دەست هەولێر بۆ ئەوەی لە پێگەیەکی باڵاوە دانوستان لەگەڵ بەغدا بکات و مافە دەستووری و داراییەکانی مسۆگەر بکات.

هەواڵ

گەروی هورمز داخرێت؛ بۆریەکەی هەرێم دەتوانێت یەک لە سەر چواری نەوتی عێراق هەناردە بکات

زیادبوونی گرژییەکانی نێوان ئێران و ئیسرائیل، ئەگەرەکانی داخستنی گەروی هورمزی هێناتەوە بەرباس، بە داخستنی ئەو گەروە بۆری نەوتی هەرێمی کوردستان بۆ بەندەری جەیهان دەبێتە فریادەڕەسی بەشێکی نەوتەکەی عێراق، بەڵام ناتوانێت هەمووی بگوازێتەوە.

ئێران و ئیسرائیل لە شەڕێکی راستەوخۆدان، لەگەڵ بەرزبوونەوەی ئاستی گرژییەکان ئەگەرەکانی داخستنی گەروی هورمزیش زیاتر دەبن. 

لە ئەگەری داخستنی گەروی هورمز، کە بەیەکێک لە گرنگترین ڕێڕەوەکانی گواستنەوەی نەوت هەژماردەکرێت، جارێکی دیکە بازاڕگەرمی بۆ بۆری نەوتی هەرێمی کوردستان بەرەو تورکیا دروست دەبێتەوە.

بە داخستنی گەروی هورمز بۆری نەوتی کوردستان - تورکیا دەبێتە تاکە دەرچەی ناردنە دەرەوەی نەوت لە عێراقەوە بۆ جیهان، چونکەداخستنی گەروی هورمز لەلایەن ئێرانەوە، گواستنەوەی نەوتی عێراق لە ڕێگەی بۆریی و بەندەری بەسرە پەکی دەکەوێت. 

بۆ عێراق، داخستنی گەرووی هورمز کەمتر نییە لە کارەساتێکی ئابووریی نیشتمانی، چونکە عێراق رۆژانە نزیکەی سێ ملیۆن و 300 هەزار بەرمیل نەوت هەناردە دەکات و زیاتر لە 95%ی لە رێگەی گەروی هورمزەوەیە.

ئەگەرچی بۆری نەوتی هەرێمی کوردستان - تورکیا تاکە دەرچەی هەناردەی نەوتی عێراقە، بەڵام ئەو بۆرییەش فریادەڕەسی کۆتایی نییە و ناتوانێت هەموو نەوتەکەی بگەیەنێتە جیهان. 

بۆری نەوتی هەرێمی کوردستان - تورکیا لە توانایدایە لە ڕۆژێکدا یەک ملیۆن و 60 هەزار بەرمیل نەوت(هەرێمی کوردستان بە کەرکووکیشەوە 450 هەزار بەرمیلی هەناردە دەکرد) بۆ بەندەری جەیهانی تورکی بگوازێتەوە، کە ئەوەیش نزیکەی تەنها یەک لەسەر چواری ئەو نەوتەیە عێراق هەناردەی دەرەوەی دەکات. 

لە بەکارهێنانی بۆری نەوتی کوردستان - تورکیا تەنها توانای هەناردە گرفتی بەردەم عێراق نابێت، بەڵکو نەخشەی دابەشبوونی بۆرییەکەش گرفتێکی دیکە و ناتوانرێت هەموو پاڵاوگە و بیرە نەوتییەکانی پێەوە ببەسرێتەوە.

بۆری نەوتی هەرێمی کوردستان لە کەرکوکەوە دەستپێدەکات و هەتا بەندەری جەیهانی تورکی لەسەر دەریای ناوەڕاست درێژ دەبێتەوە، بەدیاریکراوی بۆرییەکە 896 کیلۆمەترە و نزیکەی یەک لەسەر چواری لە سنوری هەرێمی کوردستانە و سێ لەسەر چواریشی لە دەکەوێتە سنوری تورکیا.

ئەو بەشەی بۆری نەوت کە دەکەوێتە سنوری هەرێمی کوردستان، (221) کیلۆمەترە و لە کەرکوکەوە تا فیشخاپور درێژدەبێتەوە دەکاتە (%24.6) بۆرییەکە.

هەرچی بەشە زۆرەکەشیەتی کە (675) کیلۆ مەترەو (74.6%) بۆرییەکەیە دەکەوێتە ناو خاکی تورکیا لە فیشخاپورەوە تا بەندەری جەیهانی تورکی لەسەر دەریای ناوەڕاست درێژدەبێتەوە.

ئەو بەشەی کە دەکەوێتە هەرێمی کوردستان لەلایەن کۆمپانیاکانی کار و ڕۆزنەفتەوە خاوەندارێتیی دەکرێت و بەشەی لە سنوری تورکیایە، خاوەندارێتییەکەی بۆ کۆمپانیای وزەی تورکی دەگەڕێتەوە کۆمپابیای (بۆتاش) سەرپەرشتی دەکات.

ئەگەرچی تا ئێستا هیچ ئاماژەیەکی فەرمی بۆ داخستنی گەروی هورمز نییە، بەڵام بە داخستنی ئەو گەروە دەرگای بەخت لەسەر نەوتی هەرێمی کوردستان دەکرێتەوە.

داخستنی گەروەکە هەوڵە دوو ساڵییەکەی هەرێمی کوردستان بۆ هەناردەی نەوت دەگەیەنێتە ئەنجام و داشی دانوستانیشی بەرامبەر بەغدا سوار دەکات، بە شێوەیەک کە دەتوانێت بەشێک لە مەرج و داواکارییەکانی بەسەپێنێت. 

هەناردەی نەوتی هەرێمی کوردستان لە 25ـی ئازاری 2023ـەوە بە بڕیارێکی دادگای ناوبژیوانی نێودەوڵەتی پاریس لەسەر سکاڵایەکی عێراق راگیراوە، تا ئێستا چەند جارێک کۆبوونەوە بە مەبەستی هەناردەکردنەوەی نەوتی هەرێمی کوردستان لەگەڵ حکومەتی عێراق هەبووە، بەڵام کۆبوونەوەکان ئەنجامیان نەبووە.