هەواڵ

بۆ وەستاندنی هێرشە درۆنییەکان داوای کۆبونەوەی بەپەلەی پەرلەمان دەکرێت

Mic
2025-07-17


هێڕشە درۆنییەکان بۆسەر هەرێمی کوردستان و کردنە ئامانجی کێڵگە نەوتییەکان بەردەوامە، فراکسیۆنی پارتی داوای بەڕێوەچوونی کۆبوونەوەیەکی بەپەلەی پەرلەمانی عێراق دەکات لەسەر ئەو پرە و جەختدەکاتەوە، هێرشەکان، سەروەریی عێراق، ئاسایش و سەقامگیرییەکەی تێک دەدەن.


لە سەرەتای ئەم مانگەوە 15 هێرشی درونی کراونەتە سەر هەرێمی کوردستان و بەشێکیان کێڵگە نەوتییەکانیان کردووەتە ئامانج، ئەمڕۆی درۆنێکی تر لە نزیک ناحیەی بەحرکەی سنوری پارێزگای هەولێر کەوتەخوارەوە.

حکومەتی هەرێم راگرتنی هێرشە درۆنییەکان دەخاتە ئەستۆی حکومەتی عێراق و ئەمڕۆیش، فراکسیۆنی پارتی راگەیاندراوێکی بڵاوکردەوە و تێیدا هاتووە، لە چوارچێوەی فشارە ئابوورییە ناڕەواکاندا بۆ سەر هەرێمی کوردستان، لە چەند ڕۆژی ڕابردوودا، لە ڕێگەی فڕۆکەی بێ فڕۆکەوان (درۆن)ـی بۆمبڕێژکراوەوە، ژمارەیەک هێرشی تیرۆریستی کراونەتە سەر ژمارەیەک دامەرزاوەی گرنگ لە هەرێمی کوردستان، لەنێویشیاندا ژێرخانی ئابووری، پاڵاوگەی نەوت، سەرچاوەی وزە.

فراکسیۆنی پارتی داوای بەڕێوەچوونی کۆبوونەوەیەکی بەپەلەی پەرلەمانی عێراق بۆ "تاوتوێکردنی ئەم پێشهاتە مەترسیدارانە و پێداچوونەوە بە ڕێکارەکانی حکوومەت لەمبارەوە" دەکات، ئەمەش بە مەبەستی "بە‌‌هێزکردنی ڕۆڵی دەسەڵاتی یاسادانان لە پاراستنی وڵات و هاووڵاتییاندا".

وەک لە راگەیەندراوەکەدا هاتووە، فراکسیۆنی پارتی هێرشە درۆنییەکان بۆ سەر هەرێمی کوردستان بە پەرەسەندنێکی مەترسیدار بۆ سەر سەروەریی عێراق و ئاسایش و سەقامگیرییەکەی ناو دەبات و دووپاتی کردووەتەوە، هێرشەکان زیانێکی زۆر بە شادەماری ئابووریی عێراق دەگەیەنن.  

بابەتی لێکچو

More News

Most Popular

هەواڵ

لە 16رۆژدا 15 هێرشی درۆنی کراوەتە سەر هەرێم و کێڵگە نەوتییەکان

Mic
2025-07-17


سەرەڕای هاتنە سەرخەتی ئەمریکا و هۆشدارییەکانی سودانی، بەڵام هێرشە درۆنییەکان بۆسەر کێڵگە نەوتییەکانی هەرێم بەردەوامە و بەوتەی بەرپرسێکی حکومەتی هەرێم، بەهۆی هێرشەکانەوە 200هەزار بەرمیل  بەرهەمهێنانی نەوتی رۆژانە کەمیکردووە، ئەوەش هاوکاتە لەگەڵ رێککەوتنی هەرێم و بەغدا لەسەر هەناردەکردنی 230 هەزار  بەرمیل نەوتی هەرێم.

لە سەرەتای مانگی تەمموزەوە، هێرشە درۆننیەکان بۆ سەر هەرێم کوردستان دەستیپێکردووە، ئامانجی هێرشەکان ئەمجارە کێڵگە نەوتییەکانی هەرێمە، کە بە بڕبڕەی پشتی ئابوری هەرێم ناودەبرێن

هێرشەکان ئامانجی خۆیان پێکاوە و زیانی گەورەیان بە کێڵگە نەوتییەکان و بەرهەمهێنانی نەوت گەیاندووە، تەنانەت مەترسی جێهێشتنی کێڵگەکان هەیە لەلایەن کۆمپانیا کانەوە.

عەزیز ئەحمەد، جێگری بەڕێوەبەری نوسینگەی سەرۆک وەزیرانی هەرێم 16تەمموز رایگەیاند، دوای زنجیرەیەک هێرشی فڕۆکەی بێفڕۆکەوان لەلایەن میلیشیاکانەوە ئاراستەکراون، هەرێم 200 هەزار بەرمیل نەوتی لەدەستداوە

ئەوەشی خستەڕوو، پێج کێڵگەی نەوتی هەرێم لە هێرشەکاندا کراونەتە ئامانج، کە دووانیان لەلایەن کۆمپانیا ئەمریکیەکانەوە بەڕێوەدەبرێن

بەوتەی جێگری بەڕێوەبەری نوسینگەی سەرۆک وەزیران، دەزانن کێ لە پشت ئەو هێرشانەوەیە، کە دەکرێنە سەر کێڵگە نەوتییەکان و دەشزانن لە کوێوە هێرشەکان دەکرێن و وتی: هاوبەشە ئەمریکییەکانمان لە ئامرازەکانی بەرگری لە وزە و ژێرخانی مەدەنی خۆمان بێبەشیان کردووین، ئێمە ئێستا پێویستمان پێیان هەیە بۆ ئەوەی یارمەتیمان بدەن بەرگری لە خۆمان بکەین.

لە 1ی تەمموزەوە تا ئێستا، سێ هێرشی درۆنی بەچوار درۆن كراونەتە سەر هەولێر و پێنج هێرش بە پێنج درۆن كراونەتە سەر سلێمانی و چوار هێرشی درۆنی كراونەتە سەر دهۆك و هەروەها، دوو هێرش بە سێ درۆن كراونەتە سەر زاخۆ.

هێرشەدۆنییەکان لە سەرەتای ئەم مانگەوە دەستیپێکردووە، بەڵام لە 14 مانگەوە ئامانجەکەیان گۆڕی بۆ کێڵگە نەوتییەکان، لە سێ رۆژدا هەریەک لە کێڵگە نەوتییەکانی "خۆرمەڵە، سەرسەنگ، ئەتروش، پێشخابور، باعەدرێ، تاوكێ، هەنت ئۆیڵ" بوون بە ئامانجی درۆنەکان.

ئەمڕۆ، وەزارەتی دەرەوەی ئەمەریکا بە توندی ئیدانەی هێرشى بەردەوامی فڕۆکەی بێفڕۆکەوانەكانی کرد، کە کێڵگە نەوتییەکانی هەرێمی کوردستان دەکەنە ئامانج، هۆشداریشیدا لەوەی ئەو هێرشانە هەڕەشە لە سەقامگیری و ئایندەی ئابوری عێراق دەکەن.

وەزارەتی دەرەوەی ئەمریکا لە بەیاننامەیەکدا دووپاتی کردەوە، پاراستنی خاک و سەرجەم هاوڵاتیان، ئەركی  حكومەتی عێراقە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved