هەواڵ

کاریگەرییەکانی چین؟… سزاکە جێبەجێ بکرێت نەوەی نوێ بێ سەرۆک بەشداری هەڵبژاردن دەکات

Mic
2025-08-13

سەرۆکی جوڵانەوەی نەوەی نوێ لە زیندانە و سزای شەش مانگ زیندانیکردنی بەسەردا سەپێندراوە، ئەگەر سزاکە جێبەجێ بکرێت شاسوار عەبدولواحید ناتوانێت بەشداری بانگەشەی هەڵبژاردن بکات و ئەوەیش نەوەی نوێ ڕووبەڕووی چەند ئاڵەنگارییەک دەکاتەوە.

سزادانی شاسوار عەبدولواحید بە شەش مانگ زیندانیکردن هەموو ئاماژەکان بەو ئاڕاستەیە دەبن کە جوڵانەوەی نەوەی نوێ بەبێ سەرۆک بەشداری هەڵبژاردنی پەرلەمانی عێراق بکات.

شاسوار عەبدولواحید لە گرتە ڤیدیۆیەکدا لە پێش دەستگیرکردنی تۆماری کردووە و دوای دەستگیرکردنی بڵاوکراوەتەوە، زیندانیکردنی لە ماوەی بانگەشەی هەڵبژاردندا وەک ئەگەرێک باس کردووە.

بەپێی زانیارییەکان، شاسوار عەبدولواحید وەک ئامادەکارییەک بۆ ئەو ئەگەرە چەند ڤیدیۆیەکی تۆمار کردووە و بڕیارە لە ماوەی زیندانیکردنیدا بڵاوبکرێنەوە.

رۆژی 10ـی ئابی 2025، شاسوار عه‌بدولواحید سه‌رۆكی‌ جوڵانه‌وه‌ی‌ نه‌وه‌ی‌ نوێ لە پەیامێکی ڤیدیۆیدا رایگەیاند، ئەگەر ئەم هەفتەیە مووچە نەیەت، هەفتەی داهاتوو چاوه‌ڕێی‌ هه‌ڵوێستێكی‌ زۆر گرنگ بن له‌ نه‌وه‌ی‌ نوێوه‌.

ئەم پەیامەی سەرۆکی جوڵانەوەی نەوەی نوێ لە چوارچێوەی هەمان ئەو هەڵمەتەدا دەبینرێت کە بۆ ماوەی دەستگیرکردنی ئامادەیی کردووە، چونکە بەپێی وتەی خۆی و نوسراوەکانی دادگا پێش بڵاوکردنەوەی ئەو پەیامەکە لە دەستگیرکردن ئاگادارکراوەتەوە.

دەستگیرکردن و ئەگەرە بەهێزەکان بۆ بەشدارینەکردنی شاسوار عەبدولواحید لە بانگەشەی هەڵبژاردنی پەرلەمانی عێراق کە بڕیارە مانگی 11 ئەنجام بدرێت، نەوەی نوێ روبەڕوی چەند ئاڵەنگارییەکی سەرەکی دەکاتەوە.

یەکەم ئاڵەنگاریی؛ نەبوونی فیگەر و لیدەری هەڵبژاردن دەبێت کە بتوانێت پەیامی نەوەی نوێ ئاراستە بکات و کاردانەوە دروست بکات.

هۆکاری سەرەکی ئاڵەنگارییەش بۆ ئەوە دەگەڕێتەوە، شاسوار عەبدولواحید تاکە بڕیاردەری نەوەی نوێیە، لە دەرەوەی ئەو کەس دەسەڵاتی بڕیاردانی نییە.

جوڵانەوەکە جگەلە فراکسیۆنەکان، هیچ پەیکەرەییەکی بەڕێوەبردنی نییە و لە ماوەی رابردوودا لەلایەن شاسوار عەبدولواحیدەوە هەڵوەشێندراونەتەوە

ئاڵەنگارییەکی دیکە؛ هەڵنەگرتنی بەرپرسیارێتییە چونکە کەسێتی شاسوار عەبدولواحید بە جۆرێکە هەر کارێک ئەگەر خۆی نەیکات بە هەڵەی دەزانێت و رۆڵ بە کەس نادات.

پێنەدانی رۆڵ بە کەسانی دیکە لە ئامادە نەبوونی شاسوار عەبدولواحیدا، نەوەی نوێ روبەڕوی قەیرانی بەرپرسیارێتی دەکاتەوە و کەس ئامادە نابێت لە ئەو بەرپرسیارێتییە هەڵبگرێت کە شاسوار عەبدولواحید لە هەڵبژاردنەکاندا لە ئەستۆی گرتووە هەموو باش و خراپییەکانی بە دەستکەوتی خۆی زانیووە.

نەوەی نوێ و خودی شاسوار عەبدولواحیدیش ئەو ئاڵەنگارییانە ڕەتدەکەنەوە و پێیان وایە، دەتوانن بەبێ ئامادەبوونی ئەویش گرەوی هەڵبژاردن ببەنەوە.

شەوی رابردوو شاسوار عەبدولواحید دوای چەند ئاگادارکردنەوەیەکی پێشوەختە لەلایەن دادگاوە دەستگیرکرا، وەک لە نوسراوێکی دادگای سلێمانیدا هاتووە، دەستگیرکردنەکە پەیوەستە بە دۆسیەی هەڕەشەکردنەوە و بەپێی ماددەی 431 لە یاسای سزادانی عێراقی دەستگیرکراوە.

سکاڵاکە لە ساڵی 2021 لەلایەن ئەندامێکی پێشووی پەرلەمانی کوردستان لە فراکسیۆنی نەوەی نوێ دژی شاسوار عەبدولواحید تۆمار کراوە، دادگا دوای چەند دانیشنتنێک بە نائامادەیی سزای 6 مانگ زیندانیکردنی بەسەر شاسوار عەبدولواحیدا سەپاندووە بەشێوەیەک کە کەفالەتیش نایگرێتەوە

وەک پۆلیسی سلێمانی رایگەیاندووە، ئەمڕۆ شاسوار عەبدولواحید دەبرێتە بەردەم دادوەر و وتەی لێ وەردەگێرێت کە دەکرێت کاریگەری لەسەر ماوەی دەستگیرکردنی هەبێت.

بابەتی لێکچو

More News

Most Popular

هەواڵ

بەربەستە گەورەکەی بەردەم ناردنی مووچە نەما

Mic
2025-08-13


رێککەوتنی وەزارەتی سامانە سروشتییەکان و وەزارەتی نەوتی عێراق لەسەر میکانیزمی هەناردەکردنەوەی نەوتی هەرێمی کوردستان، بەربەستی گەورەی بەردەم ناردنی مووچەی هەرێم لەلایەن بەغداوە لادەبات، بەغدا بیانوی بۆ نەناردنی مووچە بەدەستەوە نامێنێت.


ئەمڕۆ، وەزارەتی سامانە سروشتییەکانی هەرێمی کوردستان، لە ڕاگەیەنراوێکدا بڵاویکردەوە، لەسەر میکانیزمی هەناردەکردنەوەی نەوتی هەرێم، لەگەڵ وەزارەتی نەوتی حکوومەتی عێراق ڕێککەوتین، ڕێککەوتنەکەش لە لایەن 23 کەسایەتی شاندی هەردوولا واژۆ کراوە، کە 17ـیان ئەندامی شاندی وەزارەتی نەوتی عێراق بوون.

وەک لە راگەیەندراوەکەدا هاتووە، کۆبوونەوەکان لە 17ـی مانگی ڕابردووەوە دەستیان پێکرد و لەم ماوەیە سەردانی تەواوی کێڵگەکانی نەوتی هەرێم کراوە و دوای هەڵسەنگاندنی کێشەکانی هونەری گفتوگۆیەکی زۆر، لە 11ـی ئەم مانگە ڕێککەوتن لەسەر میکانیزمی هەناردەکردنەوەی نەوتی هەرێم کراوە، کە بە گوێرەی بەرهەمی ڕۆژانەی کێڵگە نەوتییەکان دەبێت.

وەزارەتی سامانە سروشتییەکانی هەرێمی کوردستان ئاماژەی بەوەکردووە، 50 هەزار بەرمیل نەوت بۆ پێویستی ناوخۆی هەرێم گلدەدرێتەوە، بەرهەمەکەی دیکە بۆ هەناردەکردن ڕادەستی کۆمپانیای سۆمۆ دەکرێت.

لەبارەی وادەی هەناردکردنی نەوتی هەرێمەوە لە راگەیەندراوەکەدا هاتووە، بۆ دەستپێکردنەوەی هەناردەکردنی نەوتی هەرێمی کوردستان، ماوەتەوە حکومەتی فیدراڵ لەگەڵ حکومەتی تورکیا قسە بکات و پرۆسەکە جێبەجێ بکرێت.

لە ئاداری ساڵی 2023ـەوە، هەناردەی نەوتی هەرێمی کوردستان بەهۆی سکاڵایەکی عێراق لە دژی تورکیا تۆمارکرا، لە ڕێگەی بەندەری جەیهانی تورکیا ڕاگیرا.

لەماوەکانی رابردوودا، بەرپرسانی حکومەتی هەرێمی کوردستان ئاماژەیان بەوەدەکرد، کە راگرتنی نەوتی هەرێم، بە بەهای زیاتر لە 50 ملیار دۆلار زیانی بە ئابوریی عێراق و هەرێمی کوردستان گەیاندووە.

لە دوو مانگی رابردوودا، نەناردنی مووچەی هەرێم لەلایەن بەغداوە، کێشەکانی هەرێمی قوڵترکردەوە، بەغد سوربوو لەسەر ئەوەی کە چیتر مووچە نانێرێت تا ئەوکاتەی نەتی هەرێم هەناردەدەکرێت، لەئێستادا مووچەخۆرانی هەرێم مووچەی مانگی 6 و 7 وەرنەگرتووە.

ناردنی مووچەی هەرێم بەسترابووەوە بە هەناردەکردنەوەی نەوتی هەرێمەوە، ئێستا هەرێم لەگەڵ بەغدا لەسەر ئەو پرسە رێککەوتووە، بۆیە چاوەڕێ دەکرێت، حکومەتی عێراق پابەندی خۆی بە ناردنی مووچە دەرببڕێت.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved