هەواڵ

ئاگرەکەی هەڵەبجە لە کۆنترۆڵ دەرچووە

Mic
2025-08-18


لە 17ـى ئابەوە ئاگر لە ناوچەی چنار و مۆردین و نەیجەڵە، لە سنوری پارێزگای هەڵەبجە کەوتووەتەوە و تائێستا دوو کەس لەکاتی هەوڵدان بۆ کۆنترۆڵکردنی ئاگرەکە سوتاون و گیانیان لەدەستداوە، بەوتەی پارێزگاری هەڵەبجە ئاگرەکە کۆنترۆڵ نەکراوە.

نوخشە ناسیح، پارێزگاری هەڵەبجە رایگەیاند، ئاگرەکەی ناوچەی چنار و مۆردین و نەیجەڵە تائێستا کۆنترۆڵ نەکراوە، بۆ پاراستنی گیانی تیمەکانی ئاگرگوژێنەوە و هاوڵاتییان، رێنماییان کردوون نزیکی ئاگرەکە نەبنەوە.

پارێزگاری هەڵەبجە وتیشی: ئاگرەکە زۆر تەشەنەی کردووە و خێرایی با وایکردووە ئاگرەکە زیاتر پەرە بسێنێت، بۆیە داوای هاوکاریمان لە پارێزگای سلێمانی کردووە و تیمی هاوکاری دێتە ناوچەکە بۆ کۆنترۆڵکردنی ئاگرەکە.

لەکاتی هەوڵدان بۆ کوژاندنەوەی ئاگرەکە، ئاری موختار کە گەنجێکی خۆبەخشبوو، سوتا و بەهۆی زۆری رێژەی سوتاویییەکەیەوە، شەوی رابردوو گیانی لەدەسدا.

هەروەها، ئەمڕۆ محەمەد حەیدەر، کە پۆلیسی دارستان بوو بەهۆی زۆری رێژەی سوتاوییەکەوەیە کە لەکاتی هەوڵدان بۆ کۆترۆڵکردنی ئاگرەکەدا سوتابوو گیانی لەدەستدا، بەوەش ژمارەی ئەو کەسانەی بەهۆی ئاگرەکەوە لە 24 کاتژمێردا گیانیان لەدەستدا گەیشتە دوو کەس.

ئاگرەکەی ناوچەی چنار و مۆردین و نەیجەڵە لە سنوری پارێزگای هەڵەبجە کۆنترۆڵنەکراوە و زیانی گەورەی بە دارستان و ژینگەی ناوچەکە گەیاندووە، سەختی ناوچەکە و خێرایی با، کۆنترۆڵکردنی ئاگرەکەی قورس کردووە.

بابەتی لێکچو

More News

Most Popular

هەواڵ

کشانەوەی کتوپڕی ئەمریکا شڵەژانی ئەمنی لە عێراق دروستکردووە

Mic
2025-08-20

کشانەی هێزەکانی ئەمریکا لە بنکەی سەربازی عەین ئەسەد و فڕۆکەخانەی نێودەوڵەتیی بەغدا، ترسی خستوەتە دڵی بەشێک لە بەرپرسانی باڵای ئەمنی عێراق و شڵەژانی دروستکردوە، هەندێکی تریشیان بەسەرکەوتنی هەوڵی حکومەتی دەزانن بۆ دەرکردنی ئەمریکا.

کشانەوەی کتوپڕی هێزەکانی ئەمریکا مانگێک پێش وادەی دیاریکراو، گومانی لای بەرپرسان و شرۆڤەکاران دروستکردووە، وەک ئاماژەیەک بۆ دەستپێکردنەوەی گەڕێکی دیکەی شەڕ لە نێوان ئیسرائیل و ئێران لێکیدەدەنەوە کە رەنگە پریشکی ئەمجارە عێراقیش بگرێتەوە.

دەستپێکردنی کشانەوەی هێزەکانی ئەمریکا لە بەغداوە بۆ هەرێمی کوردستان، مانگێک پێش وادەی دیاریکراوە، کە بڕیاربوو لە مانگی ئەیلول رێککەوتنی نێوان واشنتن و بەغدا بۆ کشانەوە جێبەجێبکرێت، شڵەژانی ئەمنی دروستکردووە و ترسی خستووەتە دڵی بەرپرسانی ئەمنی.

یاسر وتوت، کە ئەندامی لیژنەی ئاسایش و بەرگریی پەرلەمانی عێراقە، سەرسوڕمانی خۆی نيشانداوە لە کشانەوەی هێزەکانی واشنتۆن لە عەین ئەسەد لە رۆژئاوای عێراق و پێوایە ئەو هەنگاوە هەڕەشە لە تێکچونی ئاسایشی عێراق دەکات.

هەرچەندە لە دوو رۆژی رابردوودا باڵیۆزخانەی ئەمریکا لە عێراق روونکردنەوەیەکی داو تێیدا ئاماژەی بەوەکرد، ئەرکی هێزەکانیان بۆ راوێژکاری دەگۆڕێت و لە رووبەرووبەنەوەی داعش بەردەوام دەبن، بەڵام ئەمە بەس نەبوو بۆ رەواندنەوەی نیگەرانی بەرپرسانی ئەمنی عێراق.

ماوەی 20 ساڵ بەسەر نەمانی رژێمی بەعس لە عێراق تێدەپەرێ و تا ئێستا هێزی سەربازیی ئەمریکی کە لە ژێر ناونیشانی جۆراوجۆر لە عێراقن، هەن.

ئەمریکا تا ساڵی 2011 بە بیانووی ریشەکێشکردنی بەعس و گەڕاندنەوەی سەقامگیری بۆ عێراق و دوای 2014 ش بە هۆی بوونی داعش، سەربازان و راوێژکارانی سەربازیی خۆی لە عێراق نەکشاندۆتەوە.

لەكاتێكدا سەباح نوعمان، وتەبێژی فەرماندەی گشتیی هێزە چەکدارەکان، کشانەوەی هێزەکانی هاوپەیمانی نێودەوڵەتی لە عێراق بە یەکێک لە دەستکەوتە هەرە بەرچاوەکانی حکومەت ناوبرد.

نوعمان ئاماژەی بەوەشکردوە، کشانەوەی هاوپەیمانان بەڵگەیەکی رونە کە حکومەت دەتوانێت سەقامگیری وڵات بپارێزێت و چیتر پێویستی بە پشتیوانی دەرەکی نییە.

پێچەوانەی وتەبێژی فەرماندەیی گشتیی هێزە چەکدارەکان؛ ئەسكەندەر وتوت، دەڵێت، هەنگاوەکەی ئەمریکا لەم کاتە هەستیارەدا جێگەی سەرسوڕمانە، بە لەبەرچاوگرتنی ئەو هەڵكشانە سیاسی و ئەمنییە توندانەی بەرۆكی ناوچەكەی گرتووە.

پاش لەناوبردنی داعش، ئەمریکا هەزاران سەربازی خۆی لە عێراق کشاندەوە، بەڵام ئێستا نزیکەی دوو هەزار و 700 سەربازی لە عێراق هەیە و واشنتن ئەرکی بەشێک لە هێزەکانی کۆتایی پێدێنێت و بەشێکیشیان ئەرکیان بۆ راوێژکاری دەگۆڕێت.

ئەو كشانەوە كتوپڕش دوای ئەوەدێت، ئەمریکا هەڵوێستێکی توندی لە دژایەتیكردنی دەرکردنی یاسای حەشدی شەعبی دەربڕی و بە فروانبوونی هەژمونی ئێران لە عێراق دەزانێت، کە بەشێک لەلایەنە شیعەکان بەتوندی کار بۆ تێپەڕاندنی دەکەن لە پەرلەمان.

لەچەند رۆژی رابردوودا عەلی لاریجانی، ئەمینداری گشتی ئەنجومەنی باڵای ئاسایشی نیشتمانی ئێران، یاداشتێکی لێکتێگەیشتنی لەگەڵ عێراق سەبارەت بە ئاسایشی سنورەکان واژۆ کرد، ئەمەش بە هۆکارێکی دیکەی خێراکردنی کشانەوەی ئەمریکا لە عێراق لێکدەدرێتەوە.

چاودێرانی سیایی و شرۆڤەکاران پێیان وایە لە بەرژەوەندی عێراقدا نییە هاوپەیمانی نێودەوڵەتی لەم کاتە گرنگ و هەستیارەدا بکشێتەوە، چونکە بۆشایی ئەمنی دروست دەبێت و ترس لە تێکچونی دۆخی ئەمنی عێراق دەکرێت.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved