تەندروستی

٩ سوودی سەرسوڕهێنەری خواردنی هێلکە لە بەیانیاندا

خواردنی 4-7 هێلکە لە هەفتەیەکدا دەبێتە هۆی کەمکردنەوەی ئەگەری تووشبوون بە نەخۆشییەکانی دڵ بە ڕێژەی 75%”.
هێلکە لە ژەمەکانی بەیانیاندا لە سەرانسەری جیهاندا وەک ماددەیەکی خۆراکی پێویست دادەنرێت، جا چ هێلکەی کوڵاو، یان سورکراو، یاخود هێلکەی تێکەڵکراو پێشکەش بکرێت، چەندین سوودی هەیە، بەپێی ئەو زانیارییانەی کە ماڵپەڕی Health Shots بڵاویکردووەتەوە.

هێلکە ڕێژەیەکی زۆر لە ماددە خۆراکیەکان لەخۆدەگرێت، ڤیتامینەکانی A، B5، B12، D، E، K، و B6، فۆلێت، فسفۆڕ، کالیسیۆم، زینک، پرۆتین، چەوری تەندروست لەخۆدەگرێت، کە ئەم سوودانە بە جەستە دەبەخشێت:
1.باشترکردنی ئاستی کۆلیسترۆڵ
کۆلیسترۆڵ مادەیەکی مۆمی و چەورییە و لە هەموو خانەکانی لەشدا هەیە ،توێژینەوەکان دەریانخستووە کە خواردنی هێلکە ڕۆژانە دەتوانێت یارمەتیدەر بێت بۆ زیادکردنی ئاستی HDL، یان کۆلیسترۆڵ.

2. کەمکردنەوەی ترایگلیسیرید
ترایگلیسیرید لە خوێندا هەیە، بەرزبوونەوەی ئاستی ئەگەری تووشبوون بە نەخۆشییەکانی دڵ و جەڵتەی مێشک زیاد دەکات، هێلکە ترشی چەوری تێدایە کە دەتوانێت یارمەتی دابەزاندنی ئاستی ترایگلیسیرید بدات.

3. دابینکردنی پرۆتینی تەواو
هێلکە هەر نۆ ترشە ئەمینییە "پێویستەکان" لەخۆدەگرێت، کە بنەمای بنیاتنانی پرۆتینن، بەو پێیەی جەستە توانای دروستکردنی ئەو پرۆتینانەی نییە، پێویستە هێلکە بخرێتە ناو خۆراکەوە.

4. هەستکردن بە تێری
دەستپێکردنی ڕۆژ بە هێلکە بۆ نانی بەیانی دەتوانێت یارمەتیت بدات بۆ ماوەیەکی زیاتر هەست بە تێری بکەیت و بەم شێوەیەش بە درێژایی ڕۆژ کەمتر بخۆیت.

5. تەندروستی دڵ باشتر
خواردنی یەک بۆ سێ هێلکە لە هەفتەیەکدا یارمەتیدەرە بۆ کەمکردنەوەی ئەگەری تووشبوون بە نەخۆشییەکانی دڵ و خوێنبەرەکان. لێکۆڵینەوەکان دەریانخستووە کە خواردنی 4-7 هێلکە لە هەفتەیەکدا دەبێتە هۆی کەمکردنەوەی ئەگەری تووشبوون بە نەخۆشییەکانی دڵ بەڕێژەی 75%.

6. بەرەوپێشبردنی تەندروستی مێشک
خواردنی هێلکە کە دەوڵەمەندە بە ڤیتامین D یارمەتی باشترکردنی تەندروستی مێشک دەدات چونکە ڤیتامین D پێکهاتەیەکی گرنگی مادەی خۆڵەمێشییە لە مێشکدا. هەروەها هێلکە کۆلین لەخۆدەگرێت کە یارمەتی کەمکردنەوەی هەوکردن و بەرزکردنەوەی کارکردنی مێشک دەدات.

7. باشترکردنی توانای بەرگری لەش
هێلکە هێزێکی پڕۆتینە، هەروەها زینک و سیلینیۆمی تێدایە، هەردووکیان یارمەتی بەرزکردنەوەی سیستەمی بەرگری سروشتیت دەدەن.

8. پاراستنی تەندروستی چاو
پێکهاتەکانی هێلکە بریتین لە ڤیتامین A، لوتین، زینک، زێکسانتین کە ماددە خۆراکییە گرنگەکانن بۆ پاراستنی تەندروستی چاو. هەروەها تایبەتمەندییەکی تێدایە کە قژ لە تێکچوون دەپارێزێت.

9. پاڵپشتی هەوڵەکانی دابەزاندنی کێش
دەوڵەمەندە بە کالۆری و پرۆتینی کوالیتی بەرز، هێلکە یەکێکە لە باشترین خۆراکەکان کە دەتوانێت یارمەتی دابەزاندنی کێش بدات. هەروەها هەست بە تێربوون دەبەخشێت و میتابۆلیزم بەرز دەکاتەوە.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.