هەواڵ

ئەمریکا پڕۆژە یاسای "رزگارکردنی عێراق لە ئێران" ئامادە دەکات

دوو ئەندامی کۆماری لە کۆنگرێسی ئەمریکا  پڕۆژە یاسای "رزگاری عێراق لە ئێران" پێشکەشی کۆنگرێس دەکەن،  ئامانج لە پڕۆژەکە کەمکردنەوەی هەژموونی ئێرانە لە عێراق. 

 پڕۆژە یاسای "رزگاری عێراق لە ئێران" پڕۆژەی دوو ئەندامی کۆنگرێسی ئەمریکایە و دەیانەوێت لەو رێگەیەوە هەژموونی ئێران لە عێراق کەم بکەنەوە. 

پڕۆژە یاساکە لەلایەن جۆ ویلسۆن و جیمی پانێتا نوێنەری کۆمارییەکان لە کۆنگرێس ئامادەکراوە، جۆ ویلسۆن لەبارەی پڕۆژەکەوە لە تۆڕی کۆمەڵایەتی ئێکس نوسیویەتی،" ئامانج لە پڕۆژەکە کەمکردژنەوەی هەژموونی ئێرانە لە عێراق". 

بە پێی ناوەرۆکی یاساکە کە ئەندامەکەی کۆنگرێس بڵاویکردوەتەوە،پێویستە وەزارەتی دەرەوە، خەزێنە و ئاژانسی ئەمریکا بۆ گەشەپێدانی نێودەوڵەتی، لەماوەی 180 رۆژدا ستراتیژێکی تۆکمە بۆ کەمکردنەوەی هەژمووی ئێران لە عێراق دابڕێژن .

هەر بەپێی پڕۆژەکە، دەبێت لەو ماوەیەدا هه‌وڵى نه‌هێشتنى هه‌ژموونى ئێران بدرێت، ئەوەیش بە سزادانی  20 لایه‌نى سیاسى و كه‌سایه‌تى نزیك له‌ ئێران و دادگایکردنی بەشێکیان.

ئەو ئەندامانەی کۆنگرێس لە پڕۆژەکەیاندا داوایان کردووە، هاوكارییه‌کانی ئه‌مریكا بۆ عێراق بوه‌ستێنرێت، میلیشیاكانى حه‌شدى شه‌عبى به‌ "رێكخراوى تیرۆریستى" ناو ببرێن و له‌ به‌رانبه‌ردا پاڵپشتى ئۆپۆزسیۆن و رێكخراوه‌كانى كۆمه‌ڵى مه‌ده‌نى بكرێت.

سەید سەدرەددین قەبانچی، ئیمامی جومعە لە حسێنیەی فاتمیە لە نەجەف فشارەکانی ئەمریکای بە " جەنگی دەرونی" بەرامبەر شیعەکان ناوبرد و داوای لە دۆناڵد ترامپ سەرۆکی ئەمریکا کرد،" پەلە نەکات لە شەڕ و هەڕەشەی شەڕ". 

بە پێی راپۆرتێکی شیکاری ماڵپەری "مونتەدای عیراق"، ئه‌و پڕۆژه‌ یاسایه‌ هاوشێوه‌ى پڕۆژه‌ یاساى رزگاركردنى عێراقه‌ له‌ ده‌ستى سه‌دام حسێن، كه‌ له‌ ساڵى 1998 پێشكه‌ش به‌ كۆنگرێس كرا، به‌ڵام ئه‌مجاره‌ ئامانج دوورخستنه‌وه‌ى هه‌ژموونى ئێرانه‌ له‌ عێراق.

ئەمریکا دەیەوێت لە ڕێگەی ئەو پڕۆژەیەوە گۆرانکاری ریشەیی لە کەرەستە سیاسی و سەربازیەکانی عیراق دا بکات، شەری ئاسایی چیتر هەڵبژاردەی سەرەکی ئەمریکا نییە.

بەهۆی بەرنامە ئەتۆمییەکەی ئێران و بەردەوامی هێرشەکانی ئەمریکا بۆ سەر حوسییەکان، پنتاگۆن هێزی زیاتری بۆ ڕۆژهەڵاتی ناوەڕاست رەوانە کردووە.عەلی خامەنی رێبەری باڵای ئێران، هۆشداری داوە بە ئەمریکا و رایگەیاندووە، هەموو جۆرە دەستدرێژییەکی دەرەکی بۆ سەر خاکەکەیان رەتدەکەنەوە .

لەگەڵ پەرەسەندنی گرژییەکانی نێوان واشنتۆن و تاران کاردانەوەی بەرپرسە سیاسیەکانی عیراق روو لە زیادبوونە، محەمەد شیاع سودانی، سەرۆک وەزیرانی عیراق رەتیکردوەتەوە، عێراق بوبێتە بەشێک لە ململانێکانی ناوچەکە و رایگەیاندووە، هەرچەندە هەندێک دەنگ و لایەن هەوڵیان دا عێراق بخەنە ناو گرژیەکانەوە، بەڵام بە مامەڵەی ژیرانە توانیمان عیراق بپارێزین، چونکە ئامانجی سەرەکی ئێمە پاراستنی بەرژەوەندییە باڵاکانی دەوڵەتە.

لە دوای هێرشی بزوتەوەی حەماسی فەلەستینی بۆ سەرخاکی ئیسرائیل لە 7ـی ئۆکتۆبەری ساڵی 2023 دا گرژی و ئاڵۆزیەکانی رۆژهەلاتی ناوەراست رۆژ  لەدوای  رۆژ زیاد دەکات، بەرپرسانی سیاسیش هۆشداریدەدەن لەوەی عیراق دەبێتە سوتەمەنی یەکەمی نێوان شەری واشنتن و تاران.

هەواڵ

لەسەر سوکایەتیکردن بە سەلاحەدینی ئەیوبی سەردانەکەی یوسف زێدان بۆ هەولێر هەڵوەشێنرایەوە

دوای ئەوەی هەڵمەتێک دژی سەردانی  یوسف زێدان، نوسەر و رۆماننوسی میسر بۆ هەولێر لە تۆڕەکۆمەڵایەتییەکان دەستیپێکرد و بە سوکایەتیکردن بە سەلاحەدینی ئەیوبی تۆمەتبارکرا، ئەو نوسەرە سەردانەکەی بۆ هەولێر هەڵوەشاندەوە.

وابڕیارە رۆژی نۆی ئادار پێشانگای نێودەوڵەتی هەولێر بۆ کتێب لە هەولێر بکرێتەوە، یەکێک لەو نوسەرانەی باگهێشتی پێسانگاکە کرابوو، یوسف زێدان، نوسەر و ڕۆماننوسی میسربوو، ئەمەش ناڕەزایی لێکەوتەوە.

د.محەمەد عەلی رێكانی، ئەندامی داواكاری گشتى له‌پۆستێكى دا له‌تۆره‌ كۆمه‌ڵایه‌تیه‌كان داوای کرد، سكاڵا له‌دژى به‌رێوه‌به‌رى پێشانگاى نێوده‌وڵه‌تى هه‌ولێر بۆ كتێب و یوسف زێدان نوسه‌رى میسرى تۆمار بکرێت.

ئەندامەکەی داواکاری گشتی نوسیویەتی: بۆ ساڵی دووه‌م له‌سه‌ر یه‌ك به‌ڕێوه‌به‌رانی پێشانگای نێوده‌وڵه‌تی هه‌ولێر بۆ كتێب هه‌ڵده‌ستن به‌ بانگهێشتكردن ومیوانداری كردنی نوسه‌رێكی میسری به‌ناوی یوسف زێدان، كه‌ به‌ئاشكرا و له‌سه‌ر كه‌ناڵه‌كانی ڕاگه‌یاندن، بێڕێزی وسوكایه‌تی به‌كه‌سایه‌تی مێژویی كورد ده‌كات وده‌ڵێت "سەلاحەدین ئەیوبی، یه‌كێكه‌ له‌كاره‌كته‌ره‌ نه‌فره‌ت لێكراوه‌كانی مێژووی مرۆڤایه‌تی".

یوسف زێدان، نوسەر و ڕۆماننوسی میسر بەهۆی ئەو هێرشەی کرایە سەری سەردانەکەی بۆ هەولێر و بەشداریکردنی لە پێشانگاى نێوده‌وڵه‌تى هه‌ولێر بۆ كتێب هەڵوەشاندەوە.

ئەو نوسەرە دەڵێت: بەداخەوە ناچمە هەولێر، ئەو هەڵمەتەی لە دوو رۆژی رابردوودا بەرامبەرم کرا چاوەڕوانکراو نەبوو.

یوسف محەمەد ئەحمەد زێدان، نوسەری میسری لەدایکبووی 30ی حوزەیرانی 1958، مامۆستای زانکۆی میسرە، پسپۆڕە لە بواری ئاسەوارە مێژویی و دەستنووسە عەرەبییەکان، خاوەنی چەندین بڵاوکراوە و لێکۆڵینەوەی زانستییە لەسەر بیری ئیسلامی و سۆفیگەری و مێژووی پزیشکی عەرەبی.