هەواڵ

کۆنفراسەکەی بزوتنەوەی گۆڕانی گردەکە روبەڕوی کێشەی نەبوونی شەرعیەت دەبێتەوە

باڵی گردی زەرگەتەی بزوتنەوەی گۆڕان لە شاری سلێمانی سێیەم کۆنفرانسی بەست و ئەندامانی جڤاتی نیشتمانی بزوتنەوەکەی هەڵبژارد، بەڵام وازهێنان و کێشەی یاسایی بەرۆکیان دەگرێت. بەرپرسی لقی سلێمانی کۆمسیۆن دەڵێت، نوێنەری کۆمسیۆن ئامادەی کۆنفرانسەکە نەبووە". 

رۆژی 5ـی نیسانی 2025، باڵی گردی زەرگەتی بزوتنەوەی گۆڕان کە کوڕانی نەوشیروان مستەفا سەرۆکایەتی دەکەن، سێیەمین کۆنفرانسی نیشتمانی لە گردی زەگەتە ئەنجامدا. 

باڵەکەی گۆڕان، لە کۆنفرانسەکەدا ئەندامانی جڤاتی نیشتمانی هەڵبژارد کە ژمارەیان 55 ئەندامە و 12ئەندامی دیکەش وەك یەدەگ دانراون، دەستووری نێوخۆیی بزووتنەوەکە و بەرنامەی کاری سیاسی پەسند کراون.

بەپێی وتەی بەرپرسانی باڵی گردەکەی بزوتنەوەی گۆڕان، لە کۆبونەوەکانی جڤاتی نیشتمانی رێکخەری گشتی هەڵدەبژێردرێت و "محەمەد تۆفیق رەحیم" زۆرتین چانسی بۆ وەرگرتنی پۆستەکە هەیە، بەڵام ناوبراو بە Micـی وت، ئاگاداری ئەو بابەتە نییە و پەیوەندیشی بە سیاسەتەوە نەماوە.

کۆنفرانسەکەی باڵی گردەکەی بزوتنەوەی گۆڕان، روبەڕوی کێشەی یاسایی بووەتەوە بەو پێیەی هیچ نوێنەرێکی کۆمسیۆن بەشداری کۆنگرەکەی نەکردووە.

ئامانج عەزیز، سەرۆکی لقی سلێمانی لە کۆمیسیۆنی هەڵبژاردنەکانی عێراق بە دیجتاڵ میدیای Micـی راگەیاند، دەبێت فەرمانگەی پارت و رێخکراوەکانی کۆمسیۆنی هەڵبژاردنەکان بڕیار لە شەرعی بوونی کۆنفرانسەکە بدەن.

گۆڕانی باڵی گردی زەرگەتە، عومەر ئەحمەد سەرۆکی کۆمسیۆنی هەڵبژاردنەکانی عێراق بە دەستوەردان لە کێشە ناوخۆییەکانیان تۆمەتبار کردووە و رایانگەیاندووە، لە داگای فیدراڵی سکاڵای لەسەر تۆمار دەکەن.

کۆنفرانسەکەی گۆڕان تەنها کێشەی یاسایی نییە، بەڵکو بەشێک لە ئەندامانی کۆنفرانسەکە دوای کۆتاییهاتنی کۆنفرانس بەهۆی نیگەرانیان لە شێوازی هەڵبژاردنی جڤاتی نیشتمانی دەستبەرداربوونی خۆیان لە گۆڕان راگەیاند.

بەستنی کۆنفرانس ململانێی لە نێوان باڵەکانی بزوتنەوەی گۆراندا توندتر ژردووە، رۆڤان سەروەت کە خۆی وەک رێگەپێدراوی باڵی کوردساتی بزوتنەوەی گۆڕان لە کۆمسیۆنی باڵای سەربەخۆی هەڵبژاردنەکانی عێراق ناساندووە بە میدیای گۆڕانی راگەیاندووە،هەموو ئامادەکارییەکیان تەواوکردووە و رۆژی 10ـی ئەم مانگە لە شاری سلێمانی کۆنفرانسی نیشتمانی بزوتنەوەکە بەڕێوەبچێت.

بزوتنەوەی گۆران لە ساڵی 2009 بە سەرپەرشتی نەوشیروان مستەفا دەستی بەکاری سیاسیکرد، بەهۆی کێشە ناوخۆییەکانیەوە لە کۆتای ساڵی 2024 دا بەسەر دوو باڵدا دابەشبوو، باڵی گردی زەرگەتە لەلایەن کوڕەکانی نەوشیروان مستەفا سەرپەرشتی دەکرێت و باڵی گەڕەکی کوردسات لەلایەن دانا ئەحمەد مەجید سەرپەرشتی دەکرێت.

هەواڵ

لەسەر سوکایەتیکردن بە سەلاحەدینی ئەیوبی سەردانەکەی یوسف زێدان بۆ هەولێر هەڵوەشێنرایەوە

دوای ئەوەی هەڵمەتێک دژی سەردانی  یوسف زێدان، نوسەر و رۆماننوسی میسر بۆ هەولێر لە تۆڕەکۆمەڵایەتییەکان دەستیپێکرد و بە سوکایەتیکردن بە سەلاحەدینی ئەیوبی تۆمەتبارکرا، ئەو نوسەرە سەردانەکەی بۆ هەولێر هەڵوەشاندەوە.

وابڕیارە رۆژی نۆی ئادار پێشانگای نێودەوڵەتی هەولێر بۆ کتێب لە هەولێر بکرێتەوە، یەکێک لەو نوسەرانەی باگهێشتی پێسانگاکە کرابوو، یوسف زێدان، نوسەر و ڕۆماننوسی میسربوو، ئەمەش ناڕەزایی لێکەوتەوە.

د.محەمەد عەلی رێكانی، ئەندامی داواكاری گشتى له‌پۆستێكى دا له‌تۆره‌ كۆمه‌ڵایه‌تیه‌كان داوای کرد، سكاڵا له‌دژى به‌رێوه‌به‌رى پێشانگاى نێوده‌وڵه‌تى هه‌ولێر بۆ كتێب و یوسف زێدان نوسه‌رى میسرى تۆمار بکرێت.

ئەندامەکەی داواکاری گشتی نوسیویەتی: بۆ ساڵی دووه‌م له‌سه‌ر یه‌ك به‌ڕێوه‌به‌رانی پێشانگای نێوده‌وڵه‌تی هه‌ولێر بۆ كتێب هه‌ڵده‌ستن به‌ بانگهێشتكردن ومیوانداری كردنی نوسه‌رێكی میسری به‌ناوی یوسف زێدان، كه‌ به‌ئاشكرا و له‌سه‌ر كه‌ناڵه‌كانی ڕاگه‌یاندن، بێڕێزی وسوكایه‌تی به‌كه‌سایه‌تی مێژویی كورد ده‌كات وده‌ڵێت "سەلاحەدین ئەیوبی، یه‌كێكه‌ له‌كاره‌كته‌ره‌ نه‌فره‌ت لێكراوه‌كانی مێژووی مرۆڤایه‌تی".

یوسف زێدان، نوسەر و ڕۆماننوسی میسر بەهۆی ئەو هێرشەی کرایە سەری سەردانەکەی بۆ هەولێر و بەشداریکردنی لە پێشانگاى نێوده‌وڵه‌تى هه‌ولێر بۆ كتێب هەڵوەشاندەوە.

ئەو نوسەرە دەڵێت: بەداخەوە ناچمە هەولێر، ئەو هەڵمەتەی لە دوو رۆژی رابردوودا بەرامبەرم کرا چاوەڕوانکراو نەبوو.

یوسف محەمەد ئەحمەد زێدان، نوسەری میسری لەدایکبووی 30ی حوزەیرانی 1958، مامۆستای زانکۆی میسرە، پسپۆڕە لە بواری ئاسەوارە مێژویی و دەستنووسە عەرەبییەکان، خاوەنی چەندین بڵاوکراوە و لێکۆڵینەوەی زانستییە لەسەر بیری ئیسلامی و سۆفیگەری و مێژووی پزیشکی عەرەبی.